İlham Hüseyn
Azərbaycan hakimiyyətinin adi vəziyyətdə vətəndaşa münasibətinin illərdi şahidi oluruq. Amma müəyyən ümidlər var idi ki, qeyri-adi vəziyyətlərdə vətəndaşa doğru hər hansı addımlar atıla bilər.
Necə deyərlər, sən saydığını say, gör analoqsuz rejim nə sayır. Öncə devalvasiya fəlakəti yaşandı və açıq şəkildə vətəndaşa yardımdan imtina edildi. Hansıki, Qazaxıstan, Ukrayna, Yunanıstan anoloji vəziyyətdə xalqa sahib çıxdı, vətəndaşa dəyən zərər dövlət hesabına ödənildi. Əlbəttə, bizdə də devalvasiyadan xeyir görənlər oldu. Başda oturanların banklarının ayağına daş dəymədi. Əksinə, məlum banklar devalvasiyadan qazancla çıxdılar.
Şəhid ailələrinin “qan pulu” məsələsi də illərlə yubadıldı. Erməni kilsələrinə pulsuz qaz verənlər, ermənipərəst ölkələrdə xeyriyyə tədbirləri keçirənlər, erməniyə güllə atanların ailələrini süründürməkdən həzz aldılar.
Yalnız Milli Şuranın izdihamlı mitinqlərindən sonra müəyyən addımlar atıldı, vətəndaşlara qismən dəstək verildi.
İndiki mərhələdə isə vəziyyət daha acınacaqlıdı. Vətəndaşa ölüm paylayan əjdaha peyda olub. Belə bir vəziyyətdə dövlət “bundan da qara gün ola bilər” arqumentinə söykənməməlidir. Çünki dövlətin ən qara günü, vətəndaşın kütləvi xəstəliyə, ölümə tuş gəldiyi gündür. Məhz buna görə də bütün dövlətlər vətəndaşına əl uzatdı, sosial yardım paketləri açıqlandı, milyardlar vətəndaşın sağlamlığı üçün xərcləndi.
Azərbaycan hökuməti bu məsələdə də “analoqsuz siyasət” yürütdü. Daha doğrusu məhz bu situasiya üçün “koronapolitika” hazırladılar. TƏBİB, “Operativ qərargah” peyda oldu. Amma qısa müddətdən sonra məlum oldu ki, bu qurumların heç bir strategiyası, uzunmüddətli planları, mübarizə metodları yox imiş. Hökumətin “koronapolitika”sının sosial tərəfi daha da “analoqsuz” oldu. “Evdə qal” deməkdən başqa əllərindən heç nə gəlmədi. İctimai müzakirələrdən, sosial şəbəkələrdəki təbliğatdan sonra 190 manatlıq yardım etmək qərarına gəldilər. Sonra məlum oldu ki, bu 190 manatı əldə etmək üçün çoxlu labirintlərdən keçmək lazımdı. 10 milyon əhalinin əvvəlcə 200 min nəfərinə, sonra isə 600 min nəfərə 190 manat verməli oldular. Digər tərəfdən koronavirus fonduna küllü miqdarda vəsait toplandı. Amma bu pulların necə xərcləndiyi, nəyə xərcləndiyi məlum olmadı.
Daha sonra məlum oldu ki, “koronapolitika” ya qazanc əldə etmək də daxildi. Bir tərəfdən kütləvi cərimələmə həyata keçirildi, digət tərəfdən tibbi testlərdən pul qazandılar.
Bəli, vətəndaş səfalətlə boğuşanda, hökumət cərimələyərək, test yaxaraq, vətəndaşın cibin boşaltdı. Hələ bu da son deyil. Sən demə, vətəndaşın nifrətin qazanan hökumət, yadların hörmətin qazanmaq üçün 30 ölkəyə yardım edibmiş.
İndi karantin rejimi sərtləşdirilir və növbəti dəfə cəmi 287 min nəfərə 190 manatlıq “sürpriz” nəzərdə tutulur. 70-80 milyard manat rezervi olduğunu iddia edən hökumət, vətəndaşı 190 manata layiq görür.
Hələ utanmadan bu dilənçi payına görə vətəndaşa minnət qoyur, dövlətin analoqsuz dəstəyi kimi təqdim edirlər.
Göründüyü kimi, “uzaqgörən” hökumətimizin “koronapolitika”sı vətəndaşdan başqa hamının harayına yetişir. Kasıblar torpağın altına, varlılar otellərin damına tərəf gedir. Kasıb karantini pozanda sutkalıq həbsə, məmur balaları isə profilaktik söhbətə göndərilir.
Beləcə, hökumətin “koronapolitika”sı davam edir. Ədaləti, hüququ, mənəviyyatı virusa yoluxdurub, koronavirusla mübarizə apardıqlarını iddia edirlər.
Bir sözlə, koronavirus bir daha təsdiqlədi ki, bu hakimiyyət ən ağır gündə də, dövlətin pulun xalqa vermək istəmir. Xalqa xərclənən pulu “mənasız xərc” hesab edirlər.
P.S Bir həqiqət də var ki, karantin rejimi avtoritar rejimlərin xoşuna gəlir. Vətəndaşın evə həbs edilməsi, rejim üçün can rahatlığıdı. Buna görə koronavirusa minnətdardılar.