Bəxtiyar Hacıyev
Bəzi dostlar soruşurlar ki, niyə Gürcüstandan belə çox misal verirsən?
Gürcüstanla bağlı yazmağım nə öz ölkəmi az istəməyimlə, nə Gürcüstanı çox istəməyimlə bağlıdır. Sadə bir səbəb var. Gürcüstan xarici siyasətdə avrointeqrasiya yolu seçdi, islahatlar yolunu seçdi və hər sahədə bizi qabaqladığını görürük. Sadəcə faktları və gedə biləcəyimiz istiqaməti göstərirəm.
Nefti və qazı olmayan ölkə turizm mərkəzinə çevrildi, qibtə etdik. Təkcə Kutaisidən təkcə bir havayolu şirkətinin Avropanın 40-a yaxın şəhərinə ucuz uçuşları başladı, qibtə etdik. Avropa ilə Assosiyasiya Sazişi imzalayıb, islahatlar etdilər, Avropaya vizasız gediş-gəliş imkanı qazandılar, qibtə etdik. Vətəndaşlarımız müalicə və əməliyyat üçün ora getdi, yeyib-içmək və gəzmək üçün ora getdi, Avropaya ucuz uçmaq üçün ora getdi. İndi də koronavirusla mübarizədə erkən tədbir görüb, durumu təkrəqəmli həddə saxlayırlar, bir deputatları çıxıb “koronavirus ölkəmiz qarşısında diz çökdü” demir, başqaları vətəndaşları sosial şəbəkələrdə təhqir etmir.
Bütün bunların kökündə avrointeqrasiya dayanır. Gürcülər ölkələrinin gələcəyini Avropada görmək istədilər və görürlər, bizim kimi yalançı “dünyaya kosmosdan baxırıq” uğurları uydurmadılar.
Nəhayət, orada dövlət qulluqçuları və rəsmi şəxslər vətəndaşa xidmət üçün o vəzifələrdə oturdular, varlanmaq, talamaq üçün yox. ABŞ-da birlikdə oxuduğumuz bir gürcü dostumu 2013-cü ildə təkrar ABŞ-a gedəndə, Vaşinqtonda metroda gördüm. Çıxdıq, görüşdük, bir az dərdləşdik. Adam 3 il nazir müavini və nazir işləmişdi Gürcüstanda, nazir postunu tərk edəndən sonra Airbnb-də evinin bir hissəsini turistlərə kirayə verməklə dolanırdı.
Təsəvvür edirsiniz? 3 il nazir müavini və nazir işləyib, evinin bir hissəsini kirayə verməklə dolanan məmur… Azərbaycanda heç hansısa xırda dövlət qurumunda şöbə müdiri işləyən şəxs öz məşuqəsinin belə dolanmasına imkan verməz.
Koronavirusla mübarizədə 1 ay gecikməklə fərqi hər gün görürük. Avrointeqrasiya yolunda illərlə gecikməyimizin gələcəkdə yaradacağı fərqi təsəvvür edirsiniz?