Rüfət Səfərov
Qarabağ yürüşünə görə həbs edilənlərdən biri də cəbhəçi Baba Süleymandır. Başqaları kimi, o da Orduya dəstək məqsədi ilə dinc qaydada yürüşdə iştirak edib, siyasi yox, milli şüarlarlar səsləndirib, nə MM-in inzibati binasına daxil olmuş təxribatçı dəstənin, nə də polis avtomobilini aşıran qrupun tərkibində yer alıb.
Buna baxmayaraq, həmin yürüşdən bir qədər sonra silahdaşı Ceyhun Novruzovla birlikdə kobud surətdə saxlanılıblar, əmlakı qəsdən məhv etmədə, hakimiyyət nümayəndəsinə qaşı zor göstərmədə, ictimai qaydanın pozulmasına səbəb olan hərəkətləri təşkil etmədə ittiham olunublar.
Azərbaycanın hazırkı ağır durumuna biganə qalmayan Baba ayrı-ayrı sosial şəbəkə və platformalarda hər zaman aydın və prinsipial mövqeyini ortaya qoyub, Qarabağ, azad seçki, sosial bərabərlik, sərbəst toplaşma və ifadə azadlığı tələb edən kütləvi tədbirlərin iştirakçısı kimi məsuliyyətli vətəndaş olduğunu göstərib.
Təxminən 1 ildir ki, Baba ilə yoldaşlıq münasibətimiz vardır: virtualda və realda saysız-hesabsız ünsiyyətimiz olub. Çətin həyat şərtləri altında yaşayan, əllərinin qabarı hesabına ailəsini, 1 azyaşlı qız balasını böyüdən Baba ağır xəstədir, ürəyində problemlər var, panik atak daşıycısıdır, üstəlik, klostrofobiya, yəni qapalı məkanda qala bilməmək hissi o qədər dərindir ki, liftdən belə istifadə etmir.
Olub ku, süfrə arxasında yemək yediyimiz zaman qəfildən Baba titrəyib, tərləyib, ürək döyüntüləri artıb, nəbzi pozulub, bayılıb. Təcili tibbi yardım çağırmışıq, birtəhər özünə gəlib.
Təkcə mənim yanımda 2 dəfə belə bir duruma düşüb. Müayinə və müalicə tövsiyə etmişik, imkanının olmadığını bildirib, dostlarla birlikdə dəstəyimizi əsirgəməyəcəyimizi demişik, razılaşmayıb.
Belə durumda azadlıq və demokratiyadan ötrü hər gün yazıb, paylaşıb, etiraz edib, haqsızlıqla barışmayıb, ədalətçün savaş verib.
Məhbəsdə sağlıq durumu o həddə pisləşib ki, adətən məhbusların, xüsusilə, siyasi dustlaqların Müalicə Müəssisəsinə etap olunmasını hər vəchlə əngəlləyən hökumət Babanı oraya köçürməyə məcbur qalıb.
Çünki məhbəsdə də bir neçə dəfə öz üzərində nəzarəti itirərək bayılıb, qan-damar sistemindəki problemlər həyatını bir tükdən asılı vəziyyətə gətirib.
Az əvvəl Səbiqə ananın oğlu Baba barədə həyacanverici paylaşımını oxudum: “ Babanı istintaqa aparıblar, yolda ürəyi tutub, halı pisləşib, ac, susuz, zülm edirlər.”
Hüququn, qanunun, normanın həddini plintusdan aşağı həddə endirərək əhəmiyyətsizləşdirən rəsmilər, Babanı buraxın, iraq olsun, faciə yaşansa, başınızda daha yaman çatlayacaqdır.
Özünüz də bilirsiniz ki, sağlıq durumu son dərəcə ağırdır.