Milli Şuranın Koordinasiya Mərkəzinin üzvü Gültəkin Hacıbəyli
Tofiq Yaqubluya qarşı saxta, qondarma cinayət işinin materiallarında qeyd edilir ki, guya Tofiq bəy saat 15.25-də öz maşınının içində əyləşib xanımını gözləyən zaman yolla keçən avtomobili vurub. Yəni yolun kənarında, park edilmiş və yerindən tərpənməyən maşın arxadan hərəkət edən başqa bir avtomobili vurub. Bu qədər gülünc, axmaq yalanı yalnız Azərbaycan hüquq-mühafizə orqanları icad edə bilərdi. Ancaq bu hələ hamısı deyil.
Demək, iş materialına görə hadisə saat 15.25-də baş verib. Lap tutaq ki, yolun kənarında park edilmiş avtomobil arxadan ona çırpılan başqa bir avtomobili vurub. Bundan sonra Tofiq bəy və onun üzünə duran ər-arvad Cəbrayılovlar maşından düşməli, mübahisə etməli, dalaşmalı və Tofiq bəy əlində hazır vəziyyətdə saxladığı vintaçanla. Cəbrayılovlara xəsarət yetirməli idi. Yəni, ən azı 15-20 dəqiqə vaxt aparmalı idi bu dava.
Ancaq görün Cəvahir Cəbrayılova nə bəsirətli, nə öncəgörən falçı, cadugər, cadı imiş ki, həyat yoldaşının idarə etdiyi avtomobilin Tofiq bəyin yol kənarında park edilmiş maşınına çırpılmasından düz dörd dəqiqə əvvəl, saat 15.21-də Daxili İşlər Nazirliyinin 102 Xidmətinə zəng vurub xəbər verib ki, biz indi yolla gedirik, amma ürəyimə damıb, dörd dəqiqə sonra bizi yolun kənarında dayanmış maşın vuracaq, sonra həmin maşının sürücüsü maşından düşüb məni söyəcək, əlində hazır vəziyyətdə saxladığı vintaçanla ərimi döyüb ağır yaralayacaq!
Görürsünüzmü, Azərbaycan hakimiyyəti necə uzaqgörən, bəsirətli üzəduranlara güvənir! Kimlərin hesabına hakimiyyətini sürdürür!
Bu rəzalətə məhkəmə deyirsinizsə, daş düşsün o məhkəmənizin başına! Bu rüsvayçılığı düzüb-qoşan dələduzlar, cinayətkarlar özünü hüquq-mühafizə orqanı, prokurorluq adlandırırsa xaraba qalsın o prokurorluğu! Bu biabırçılığa “xuliqanlıq” deyib hökm çıxaracaq hakimin bütün əməlləri yüz mislilə özünün də, balalarının da qarşısına çıxsın!
Ölün, yerin dibinə girin!
Qarabağ, Vətən uğrunda canını, ailəsini fəda etmiş bir qaziyə, qəhrəmana qarşı belə rəzillik törətməklə hakimiyyətini, kreslosunu, sərvətini qoruyanları Allah da, Azərbaycan xalqı da elə rəzil edəcək ki! Görəcəksiniz!
Mütləq görəcəksiniz!