Araz Gunduz
Gənc AXCP fəallarından Baba Suleyman həbc edilməmişdən iki-üç gün öncə belə bir status yazmışdı: biz AXCP üzvləri ölüm hökmü çıxarılmış və hər an edamının icrasını gözləyən dustaqların günündəyik. Deyilən bu fikrin doğrulması özünü çox gözlətmədi. AXCP üzvləri biri-birinin ardınca həbs edildi, amansız işgəncələrə tuş gəldi… Ancaq, onların qanunsuz həbsi və amansız işgəncəyə məruz qalması yalnız “insan ovuna” həris olan İlham Əliyevin istəyiləmi oldu? Bu günahsız gənc insanların dara düşməsində, zülm çəkməsində daha kimlərin günahı var? Əlbəttə, bir qarın çörək uğruna istənilən alçaqlığı etməyə hazır olan yuxarı və aşağı ranqlı dövlət məmurlarını ilk növbədə qınamaq olar. Sonra, bu gənclərin həbsi üçün şərəfsizlik edib ictimai rəydə çaşqınlıq yaradan aslanların, raufların, fazillərin, ilqarların, daha kimlərin və kimlərin adlarını çəkmək olar. (Bəzən bu adamlar mənim təəcübümə rəğmən öz şəxsiyyətlərinin hücuma məruz qaldığından söz açırlar. Əslində bununla iki olmayan hadisə uydururlar: olmayan şeyə necə hücum etmək olar axı?) Desəm ki, hamının gözü önündə baş verən zülmdə hamının az ya çox dərəcədə günah payı var, bu yeni bir söz olmaz. Bəli, bugün AXCP-yə qarşı yönələn bu iyrənc hücumlar, murdar və mənfur amansızlıqlar, əslində zahirən onlara qarşı yönəlmişdir, mahiyyətcə isə, bizim hamımızın insanlığına, əxlaqına, mənəviyyatına tüpürmək cəhdidir. Götürün, istənilən AXCP-li fəalın əməllərinə baxın, ən yaxşısı AXCP lideri Əli Kərimlinin danışıqlarına qulaq asın və əlinizi vicdanınızın üzərinə qoyub bu insanların nəyi düz etmədiyini, nəyi doğru demədiyini dilə gətirin. Bir də, AXCP fəallarına və bir sıra ictimai fəallara qarşı aparılan divan tutma əməllərinə ünvanlanmış qınaqlara münasibət bildirmək istəyirəm. Bəli, partiya liderlərindən, partiyaların adından, yaradıcı insanlardan və birliklərdən qınaq bildirən sözlər eşidilir, ancaq inanın ki, bu qınaqları gücdən salan bir cəhət var ki, onların təsirini sıfıra endirir: bu, zülmə məruz qalanların adını uca səslə deyib, onlara zülm edən konkret ünvanı üstüörtülü saxlamaqla bağlıdır: sanki, hansısa bir fövqəltəbii qüvvə, hansısa bir kabus ölkəboyu gəzir və başını dik tutan insanları bir-bir qaranlıq zindanlara çəkib onlara ölümcül işgəncələr verir. Axı, bu zülümlərin hökmü konkret olaraq İlham Əliyevdən, onun başçılığı ilə qurulan xalqa zidd rejimdən gəlir, icraçıları isə elə bu rejimin yaratdığı qaniçən zülm aparatıdır və sizə necə qəribə görünsə də, bütün bunların azarkeşləri — tamaşaçıları da bizlərik.
İnsanlığın tarixi yalnız qanlı hadisələrin salnaməsindən ibarət deyildir, bu həm də insani tərəqqinin tarixidir və mən Kantdan başlayaraq ictimai fikrə gətirilən belə bir düşüncə ilə razıyam ki, tarixin, tərəqqiyə aparan konkret istiqaməti vardır: onu bu yolundan sapdırmağa çalışan ən müxtəlif fəlakətli hadisələr zamanın gedişində iz buraxsalar da, bu tərəqqinin qarşısında duruş gətirə bilməmişlər. Bu mənada, bugün zülmə məruz qalan insanlarımız ölkəmizin o xoş gələcəyinin müjdəçiləridir: onları susdurmağa çalışmaqla bizim gələcəyimizə qəsd etməyə çalışırlar…