İkinci Qarabağ savaşı dayandırıldı. Müharibə bitməyib. Nə vaxt və necə bitəcəyi də bəlli deyil. Bəzi sonuclar isə artıq bəllidir. Azərbaycanın imzaladığı bəyanatın mürəkkəbi qurumamış Rus “sülhməramlı” qüvvələrinin Qarabağa soxulması qələbəmizə ciddi şəkildə mənfi təsir edir və bunun ağır nəticələrini çoxları anlamır.
İndi Azərbaycan telekanallarında tüğyan edən fısqırıq xalqa xəyanətdən başqa bir şey deyil. Müharibənin gedişində xalqa ruh yü kiksəkliyi aşılanması nə qədər gərəkli idisə, indi xalqı aldatmağa yönəlik bədnam təbliğat ondan da artıq ikrah doğurur. Xalqın əksər hissəsinin anlamadığı, fərqinə varmadığı bəyanatın bu şəkildə təqdimatı da həmin xəyanətin tərkib hissəsidir. Bu bəyanat antikonstitusion aktdır – o, AR Konstitusoyasının 94 (22), 95 (17) və 109 (17, 30)-cü maddələrinin pozulmasıdır.
Bəyanatla bağlı hüquqçu Fuad Ağayevin, siyasətçi Azər Qasımlının və başqalarının bu kontekstdə rəyləri artıq topluma bəlli olduğundan və onlarla tam şərik olduğumdan bu barədə uzun danışmaq istəmirəm. İdman terminologiyası ilə desəm biz Ermənistana Rusiyanın xeyrinə 2:1 hesabı ilə qalib gəlmişik. 30 il Abxaziyada, Osetiyada və Moldovada “sülhməramlı” missiya yerinə yetirən Rusiya indi bu aqressiyanı Azərbaycanda davam etdirəcək.
Qəribə millətik. Hətta hüquqçulara da izah etmək olmur ki, bu bəyanatın nəticələri haralara gedib çıxa bilər. Onların əksəriyyəti ya bəyanatı oxumayıblar, ya da rəsmi mövqeyi kor-koranə təsdiq və təbliğ etməklə məşğuldurlar. 5 illik müddət bitdikdən sonra rus qoşunlarının sayı qısıdılmayan neçə beşilliklərdə Qarabağda qalacağına heç bir təminat verməyən bəyanatı nədən alqışladıqlarını anlamaq mümkünsüzdür.
Bu məsələ bəyanatla həll edilən məsələ deyil. O, nə qədər qəribə səslənsə də, hüquq sənədi deyil, siyasi sənəddir, qəsdən yayğın şəkildə tərtib olunub və heç bir təminatı yoxdur. Belə deklarativ qanunların və məhkəmə özbaşınalıqlarının əlində giriftar qalmış bəzi vəkillərin bu sənədi öyməsini anlamaq asan deyil. Həqiqəti deməyə cəsarəti çatmayanlar heç olmasa susa bilərdilər. Ağlım kəsmir ki, onları buna görə Vəkillər Kollegiyasından çıxarardılar…
Bəli, müharibənin dayanması itkilərin qarşısını alır, qarabağətrafı rayonların (Laçının bir hissəsi, bəlkə də Şuşa istisna olmaqla) qaytarılmasını, əslində azad edildiyini rəsmiləşdirir, lakin Dağlıq Qarabağın yarıdan çoxunun hələ də və nə zamana qədər Azərbaycan olmadığı gerçəkliyini də ortaya qoyur. Telekanalların lay-layı millətin əksər hissəsini uyudub və onlar yuxudan ayılanda artıq çox gec olacaq.
Rayonlarımızı əsgərlərimiz azad edib. Onların qanı tökülmüş torpağımızın hər qarışını öpüb gözlərimiz üstünə qoymalıyıq. Bu qələbəyə görə öncə onlara və sonra bir daha onlara təşəkkür etməliyik. Təkcə şəhidlərimizin deyil, qazilərimizin də bütün ağlabatan problemləri dövlət hesabına həll edilməlidir. İllərlə xalqın qanını içən banklar onların bütün kredit borclarını bağışlamalıdır. Qazilərin müalicəsi dövlət hesabına, ən yüksək səviyyədə təmin edilməlidir. Dövlətin mənəvi haqqı olmalıdır ki, sabah gərək olsa, onları yenidən vətənin müdafisinə çağırsın. Qazinin keyfiyyətsiz rus “Jiquli”si arzusunu qalib dövlət özü üçün təhqir saymalıdır. Birinci Qarabağ müharibəsinin daxmalarda dilənçi durumunda yaşayan qazilərinin sırası dayanmalıdır.
Bu qələbə Türkiyənin, milli və etnik mənsubiyyətindən asılı olmayaraq bütün Azərbaycan xalqının qələbəsidir. Onu özgəsinə peşkəş eləməyə kimsənin haqqı yoxdur, olmamalıdır, olmamalıydı.
Şəhidlərə rəhmət, qazilərə hörmətlə.