Nəticəyə yanaşma fərqi məsələlərə fərqli baxışdan doğur
Akif Qurbanov
Təqdim olunan razılaşmadan doğan nəticəyə yanaşma fərqi məsələlərə baxışla bağlıdır. Yəni əldə olunan razılşamadakı nəticələrə 2 cür yanaşmaq olar: cari və strateji
A) Cari yanaşmaya görə aşağıdakı ciddi nəticələr var:
- Torpaqlarımızın böyük hissəsi işğaldan azad edilib.
- Uzun illərdən sonra həsrətlə gözləyən yüz minlərlə insanımız öz yurduna qayıdacaq.
- İnsan itkisi dayanacaq.
Strateji yanaşmaya görə isə A bəndilə yanaşı aşağıdakı nəticələr var:
- Bəyanat sülh müqaviləsi deyil, atəşkəsin hansı şərtlər altında dayandığını göstərən siyasi mövqedir. Təəssüf ki, həmin bəyanat sülh müqaviləsinə dair hər hansı zamanı, şərtləri əks elətdirmir. Bu o deməkdir ki, döyüş dayansa da konflikt bitmir, hər zaman alovlana bilər. Deməli, yenə də insanımızı itirmə təhlükəsi qalır.
- Biz Dağlıq Qarabağa heç bir status vermədiyimizi öyünərək təqdim etsək də, qarşı tərəf də Azərbaycanın ərazi bütövlüyünü, DQ-da dövlətimizin suverenliyini tanıdığını ifadə etmir.
Həmçinin “de-yure status vermirik” desək də, de-fakto DQ-ın mövcudiyyətini, idarəetməmizə tabe olmamasını qəbul edirik. Üstəlik də sərhədimizdən heç bir nəzarətimiz olmayan 5 kmlik zolaqla Ermənistana rahat gedib-gəlməni təmin edən dəhliz ayırıb ərazimizdə anklav sahə yaradırıq. Və o sahədə qondarma Artsax bayrağı dalğalanmasına da heç nə edə bilməyəcəyik.
- Rusiya qoşunlarının ərazimizdə yerləşməsinə razı oluruq.
Sülhməramlı ona görə demirəm ki, Rusiya təcrübədə heç bir yerdə təkbaşına belə missiyasını nümayiş etdirməyib. Üstəlik, bəyanatda əks olunan göstəricilərə görə onları rahatlıqla qoşun, hətta hərbi baza adlandırmaq olar. Bəyanatda göstərilən müddət də elə yazılıb ki, Rusiya buradan özü istəmədikcə çıxmayacaq. Bir də ümid qalır Rusiyanın bizim onu çıxara biləcək qədər zəifləməsinə…
Türkiyənin rolu yalnız bizə köməkdir, tərəf deyil, burada cəmi 3 tərəf var və biz də Türkiyənin tərəf edilməmə vəziyyətinə razılaşmışıq. Ona görə də sülhməramlı fəaliyyətini izləmə mərkəzi və.s məsələlərini qoyun qırağa.
Vətəndaşın strateji düşünmək kimi bir borcu yoxdur, onu cari həyatı düşündürür. Ona görə də əldə olunan uğurlara, əlbəttə, sevinəcək!
Bəs dövlət rəsmisi, siyasətçi, ictimai kəsim, ziyalılar və s. necə? Onlar da cari uğuru reallıq kimi təqdim edib bütöv ölkə əhalisinə həzm elətdirməlidir? Əlbəttə, yox! Onların strateji düşünməsi həm məsuliyyətidir, həm də ictimai vəzifəsi.
Ona görə də kimsə bizi tənqidçi, müxalif mövqedə, pessimist olduğumuza görə belə etdiyimizi əsaslandıraraq strateji təhlükələrin mövcudluğundan diqqəti yayındırmağa çalışmasın.
Vizyonu olan lider, ictimai şəxs:
- Hər an qanayabiləcək yaranı içimizdə saxlayıb konflikti həll etməkdən, qələbədən danışa bilməz!
- Canı bahasına öz ərazisində ona tabe olmayan silahlı birləşmələri qovan əsgərini daha böyük hərbi təhlükə ilə üz-üzə qoymaz.
- Müstəqilliyi əsas amal kimi öyüb başqa ölkənin qoşunlarının ölkəsində yerləşməsinə razı ola bilməz.
- Problemi real olaraq görsə də, “bəlkə” lər üzərinə, kiməsə inanmaqla özünü də, ətrafını da aldatmaz.
Beləliklə, mən bu prosesi yaradanlarda və onu dəstəkləyənlərdə vizyoner baxış görmürəm.