Dövlətin mənəvi kvadraturası
İlham Hüseyn
Dünyada həm də dəyərlərin mübarizəsi gedir. Kiçik dövlətlər bu böyük oyunda dövləti uduşlu çıxarmaq yolların axtarmalıdır. Bir tərəfdə qabaqcıl təhsil, səhiyyə, müstəqil məhkəmə, şəffaf seçki, o biri tərəfdə qan, zülm, müxalifət liderin zəhərləyən “sülhməramlı dövlət başçısı” var. Milli maraqlar “işıq gələn tərəf”ə getməyi diktə edir. Əsas hədəf, prinsip 10 milyonluq xalqı ağ günə çıxarmaq olmalıdı. Bunun üçün də həm hökumət qara libası soyunmalı, həm də “qara geyimlilər” dən uzaq durmalıdı.
Dövlət ən böyük sərvətdi. Onun təkcə bu günün deyil, sabahın da düşünmək lazımdı. Dövlət maraqları naminə lazım gələndə qarışqaya elçi düşməyi də, filə kəllə atmağı da bacarmalısan. Heç bir qurban dövlətdən qiymətli deyil. Bu gün rus ayısı pəncəsiylə qorxudursa və qorxmaq dövləti zəiflədirsə, cırmaqlanmaqdan çəkinməməliyik. Bu ayı səbətdəki armudu alsa, armud ağacın da istəyəcək.
Müstəqillik əraziylə, bayraqla, orduyla bütöv olmur. Müstəqillik-müstəqil siyasət yürütmək qətiyyətiylə müəyyən olunur.
Azərbaycan dövlətinin güclü, Azərbaycan xalqının xoşbəxt olması üçün böyük potensial var. Amma illərdi bu potensial bədbəxtlik üçün sərf edilir.
Əsgərimizin səsi NATO-dan gəlməlidi, amma yağış basmış çadırdan gəlir. Ziyalının nuru ölkəni işıqlandırmalıdı, amma rejimin maraqlarında közərir. Məmur vətəndaşın qapısına getməlidi, amma vətəndaş məmur qapısından qovulur.
Məhkəmə ədalətin imarəti olmalıdı, amma ədalətsizliyin komasına çevrilib. Səhiyyə sağlam bədən verməlidi, amma xəstə adam verir. Təhsil lazımlı kadr yetişdirməlidi, amma lazımsız ənənələr yetişdirir. İqtisadiyyat şaxələnməlidi, amma inhisarda boğulur.
Dəyərsizliyin hər yerə boylandığı bir vaxtda, dəyərlərin izinə düşmək lazımdı. Səbətdən düşən ədalətsizliyi tapdayıb, qanunun aliliyin götürmək lazımdı. Seçim imkanı həmişə var. Kiçik dövləti milyon kvadrat kilometrlik əraziyə çevirə bilmərik, amma böyük dəyərlərin dövlətinə çevirə bilərik. Bəli, böyük olmaq əraziylə, əhali sayıyla olmur, dəyərlərin böyüklüyüylə olur. Bizim başqa torpaqlara iddiamız yoxdur. Deməli, içimizdə böyüməliyik, mənəvi kvadraturanı artırmalıyıq. Strategiya da, taktika da buna xidmət etməlidi.
Nüvə silahıyla deyil, nüvəmizdəki virusları yox etməklə böyüməliyik, güclənməliyik.