Tural Ağayev
Ermənistan rəhbərliyi Azərbaycanla münasibətləri normallaşdırmağa meyl edir, sərhədlərin, hava məkanlarının açılmasını, regional layihələrə qoşulmasını istəyir, Türkiyə və Azərbaycanla gələcək əməkdaşlığın planlarını cızır, sərhədlərin demarkasiyasında təmkinli münasibət ortaya qoyur, bu səbəbdən yerli əhali ilə ciddi problemləri yaranır, amma demarkasiya zamanı evlərini itirənlərə kompensasiya təklif edir. Bütün bunlar olduğu halda kiçik bir kənddə və ya qəsəbədə təxribat törətmək Ermənistan rəhbərliyinin nəyinə lazımdır? Təbii ki, regionda konfliktin iqtisadi əməkdaşlıqla əvəz olunmasını istəməyən bir qüvvə var – “sülhməramlıların” mənsub olduğu dövlət. Çünki iqtisadi əməkdaşlıq bu dövlətin yavaş-yavaş regiondan çıxarılmasına gətirib çıxaracaq. Bu səbəbdən bu dövlət heç vaxt münaqişəni sönməyə qoymayacaq.
Təəssüf ki, yenə də bir çoxu bütün bunlara görə Ermənistanı günahlandırır. Arqumentlərini gücləndirmək üçün Qarabağdakı tanınmayan qurumun təhlükəsizlik xidmətinin rəhbərinin işğaldan azad edilmiş ərazilər barədə dediyi təhdidlərə də istinad edirlər. Unudulmamalıdır ki, Dağlıq Qarabağda artıq Ermənistanın effektiv yurisdiksiyası yoxdur. O ərazi artıq bütünlüklə Rusiyanın nəzarətindədir. Həmin təhlükəsizlik xidmətinin də rəhbəri həmin ərazinin faktiki idarəçisinin maraqlarına xidmət edir, Ermənistanın yox. Yeri gəlmişkən, çox güman ki, bundan sonra Qarabağda yaşayan ermənilərin hüquqlarının pozulması ilə bağlı Avropa Məhkəməsinə müraciət etsələr, cavabdeh hökümət Ermənistan yox, Rusiya olacaq. Belə bir durumda təəssüf ki, yenə də çoxlu sayda siyasətçi, yazar, ictimai fəal ya bilməyərəkdən, ya da qəsdən hər şeyə görə Ermənistanı günahlandırır, yenə asıb kəsirlər. Hər şeyi başa düşmək üçün, görünür, bunlara 100 il az edib. Əslində Rusiyanın regionda mövcudluğunun səbəbi hər iki tərəfdən baş kəsməyə, mülki şəxsi öldürməyə, pis rəftara “müharibənin öz qaydaları var”, “onlar da bizi ediblər” deyərək hər cür cinayətə haqq qazandıran bu adamlardır. “Xocalıda bizi öldürəndə olur, biz edəndə olmur?” deyən şəxs Rusiya ordusunun Dağlıq Qarabağda mövcudluğunun qarantıdır.