Rusiyanın sərhədlərindəki siyasi böhranlar Kremlin diqqətini cəlb etməyə bilməz. Ancaq Kremlin bu proseslərlə nisbətən ehtiyatla davranması onun uzun zamandan bəri öz nüfuz dairəsi hesab etdiyi regiona daha praqmatik yanaşmağa başlamasından xəbər verir. Azad Avropa/Azadlıq Radiolarının müxbiri Metyu Laksmur bu haqda yazır.
Postsovet məkanında dəyişikliklərin müşahidə olunduğu dönəmdə Kreml məhdud resurslarla bölgəyə təsirini saxlamağın yolları haqda düşünməyə məcburdur.
Avqustda açıq-aşkar saxtakarlıq şəraitində keçən seçkilər Minskdə yüz minlərlə insanı küçəyə çıxardı. Həftələrlə çəkən etirazlar Belarus diktatorunu Moskvadan kömək istəməyə məcbur etdi.
“Təsir” anlayışı dəyişir
Sentyabrda Ermənistanla Azərbaycan arasında Dağlıq Qarabağ uğrunda münaqişə tammiqyaslı müharibəyə çevrildi. Rusiyanın həmişə əsas arbitr olduğu münaqişəyə Türkiyə də cəlb olundu.
Oktyabrda Qırğızıstanda siyasi müxalifət paytaxt Bişkekdə hökumət binalarını tutaraq Moskvaya meylli prezidenti qan tökülməsi təhdidindən dolayı istefaya məcbur etdi.
Noyabrda Moldovada prezident seçkilərində rusiyapərəst prezident Avropa ilə daha sıx əlaqələri təbliğ edən namizədə uduzdu. Bu hadisə də Moskvanın maraqlarına ziddir.
Təhlilçilər deyirlər ki, Rusiya öz həndəvərində siyasi böhranlara ötən illərdəkinə nisbətən daha ehtiyatla yanaşır, eyni zamanda, geosiyasi prioritetlərini və bunlara nail olmaq üçün əlindəki alətləri yenidən dəyərləndirir. Moskva uzun zamandan bəri öz nüfuz dairəsi kimi yanaşdığı regionda daha praqmatik siyasət yürütməyə başlayıb.
“Rusiyanın təsir anlayışı dəyişmək ərəfəsindədir. Bu, postimerial transformasiyada növbəti təbii mərhələdir”, – rusiyalı siyasi təhlilçi, Kremlin məşvərətçisi Fyodor Lukyanov deyir.
Rusiyanın imici
Dirçəlmiş və keçmiş SSRİ ərazisində öz maraqlarını qorumaq iddiasında olan Rusiyanın imici 2008-ci ildə Gürcüstana və 2014-cü ildə Ukraynaya müdaxilə nəticəsində daha da güclənmişdi. 2014-cü il böhranı zamanı Rusiya Krımı ilhaq etmiş, Donbasda silahlı üsyanı dəstəkləmək üçünsə ölkəyə hərbi müdaxiləyə başlamışdı. Bütün bunlar Kiyevdə Moskvanın maraqlarına sadiq prezidentin hakimiyyətdən getməyə məcbur edilməsindən sonra baş vermişdi.
Prezident Vladimir Putin digər ölkələrin öz problemlərini yoluna qoymalarını hətta sözdə təbliğ etdiyi zamanlarda belə, Rusiyanın regiondakı əsas güc statusunu qorumağa çalışıb. Regionda Qərbin təsirinə hər cür müqavimət göstərib, öz tərəfdarlarını isə dəstəkləyib.
2020-ci il regionun Minskdən Moldovaya, Cənubi Qafqazdan Orta Asiyaya qədər hər yerində təlatümlərlə yadda qaldı. Moskva, ən azı ilk dövrlərdə, kənarda durub hadisələrin gedişatını izləyirmiş kimi görünsə də, təhlilçilər onun passiv davranmasını geosiyasi geriçəkilmədən çox, öz məhdudiyyətlərini anlaması ilə əlaqələndirirlər.
“Heç bir müftə güzəşt yoxdur”
“Moskva keçmiş sovet respublikalarından yaranmış bütün ölkələri sərbəst hesab edir. Rusiyaya görə, SSRİ-nin dağılmasından 30 il sonra onların hamısı xarici dövlətlərdir. Emosiyalar siyasətdən ayrı tutulur: heç bir xüsusi bağlılıq, heç bir müftə güzəşt yoxdur”, – Moskva Karneqi Mərkəzinin direktoru Dmitri Trenin köşə yazısında qeyd edib.
Bu, yeni yanaşma maddi şərtlərdən qaynaqlanmış ola bilər.
Moskvanın yaratdığı Avrasiya İqtisadi Birliyi Avropa Birliyinə rəqib olmalı və keçmiş SSRİ ərazisində 200 milyonadək insanı birləşdirməli idi. Ancaq Rusiya bu layihəni maliyyələşdirmək istəməyəndən sonra digər üzvlər onun siyasi motivlərini sorğulamağa başladılar və daha dərin inteqrasiya baş tutmadı.
Qərbin sanksiyalarının özü-özlüyündə Rusiyanın xarici və daxili siyasətdə mövqeyinə təsiri o qədər də böyük olmayıb. Ancaq sanksiyalar COVID-19 pandemiyası ilə birlikdə ölkə iqtisadiyyatına zərbə vurub və onun regiona yanaşmasını rasionallaşdırıb, – ABŞ Dəniz Piyadaları Universiteti nəzdində Krulak Mərkəzində Rusiya hərbi və siyasi strategiyasını araşdıran Yuval Veber belə deyir.
“Pul göndərməyəndə…”
Seçkilərdə Rusiyanın dəstəyinə arxalanan keçmiş sovet respublikalarının liderləri bu dəstəyin “quruması” nəticəsində daha ağır təzyiqlə üzləşiblər. Rusiya bir növ xarici siyasətində qənaət rejiminə keçib. “Pul göndərməyəndə insanlar sənin tələbini o qədər də tez qəbul etmirlər”, – Veber deyir.
Sözsüz ki, Rusiya regiondakı rolundan imtina etməyib. Cənubi Qafqazda əvvəl tərəddüd edirmiş kimi görünsə də, həftələrlə davam edən qanlı döyüşlərdən sonra öz sülhməramlılarını Qarabağa yerləşdirməklə hərbi iştirakını genişləndirdi. Ancaq o, həm də Azərbaycanın ən yaxın müttəfiqi Türkiyəni atəşkəsi monitorinq prosesinin iştirakçısı etməklə onun prosesdə fəal iştirakını legitimləşdirmiş ola bilər.
Putin şəxsi sədaqət və dəstək vədlərinə əsaslanan idarəçilik ənənəsini genişləndirməklə regiondakı müttəfiqlərini fəal dəstəkləməkdədir. “Biz sizi dövlət başçısı kimi dəstəkləmək üçün hər şeyi edəcəyik”, – o, sentyabrın 28-də Qırğızıstan prezidenti Sooronbay Jeenbekovla görüşdə ona demişdi. Jeenbekov mübahisəli parlament seçkilərindən sonra hakimiyyətdən getməli olmuş, Moskva isə onun xeyrinə hər hansı müdaxilə etməmişdi.
Putinin çıxardığı dərslər
Avrasiya İqtisadi Birliyi kimi, Moskvanın başladığı digər transmilli layihələr də uğursuz olub. Belarus lideri Aleksandr Lukaşenko Moskvanın tələblərini yerinə yetirmək üçün çox ciddi təzyiqə məruz qalsa da, Rusiya və Belarusun birgə dövlətini yaratmaq planı daşa dəydi. Lukaşenko bu tələbləri Moskvanın onun hakimiyyətinə dəstəyi müqabilində yerinə yetirməli idi. Ancaq bu dəstək Lukaşenkonu ölkə üçün lənət sayan belarusluları Rusiyaya qarşı çevirə bilərdi.
Doğrudan da, Belarusdakı siyasi böhran Kremlə Qarabağ müharibəsi və Qırğızıstandakı üsyandan daha yaxın idi. Lukaşenkonun 26 ildə qurduğu rejim bir çox əlamətlərinə görə Putinin Rusiyada qurduğu rejimi xatırladır: daim Qərbdən şübhələnən, hakimiyyətdən getməzdən öncə etirazları əzməyə fokuslanan superprezident siyasi sistemi.
Lukaşenkoya sadiq təhlükəsizlik qüvvələri avqustun 9-da ziddiyyətli seçkilərin ardınca Belarusu lərzəyə gətirmiş etiraz yürüşlərini dəf etmək üçün ifrat dərəcədə zorakılıq göstəriblər. Putin 2024-cü ildə beşinci dəfə prezident olmaq istəsə, ölkəsində baş qaldıracaq etirazları yatırmaq üçün eyni taktikaya əl ata bilər. Bu zaman o bu il yaxın qonşuluğunda baş qaldırmış böhranlardan götürdüyü dərslərdən yararlana bilər.
“Belarusda baş verən hadisələri sadəcə kənara qoya bilməzsən. Lukaşenko Putinin oxşar vəziyyətlərdə hərəkət etdiyi kimi davranır. Əgər Belarusda etirazlar mümkün oldusa, 2024-cü ildə Rusiyada etirazların baş qaldırmayacağına əmin ola bilmərik”, – siyasi təhlilçi və Kremlin keçmiş spiçrayteri Abbas Qallyamov deyir.
Azadlıq radiosu