AXCP sədri Əli Kərimli
İnanmaq çətindir. Ancaq təəssüf ki, gerçəkdir. Şanlı ordumuzun 28 illik işğaldan azad etdiyi Şuşaya ilk səfərini etmiş İlham Əliyev orada da “AXC- Müsavat”dan danışıb, AXC və Müsavatın hakimiyyətə gəlmək üçün Şuşanı satdığını deyib. Yenə də canını Vətənə qurban vermiş minlərlə cəbhəçi şəhidin haqqını danıb, ruhunu incidib. Heç düşünməyib ki, ondan soruşarlar: bu necə alqı-satqı əməliyyatı olub ki, AXC Şuşa şöbəsinin yaratdığı yerli özünümüdafiə batalyonunun komandiri, AXC Şuşa şöbəsinin sədri, Milli Qəhrəman Ramiz Qəmbər başda olmaqla 158 cəbhəçi şəhərin müdafiəsi uğrunda döyüşlərdə şəhid olub?
Şuşanın müdafiəsinin son həftələrində cəbhəçilər döyüş meydanlarında şəhid olanda YAP Bakıda Milli Məclisin qarşısında gündəlik aksiyalar keçirirdi. Bilirsiniz YAP nə tələb edirdi həmin aksiyalarda? Yox, onların tələbi Şuşanın müdafiəsi ilə bağlı deyildi. Onlar məhz hakimiyyət davası edirdilər. Tələb edirdilər ki, Konstitusiyada dəyişiklik edilsin. O vaxtkı Konstitusiyaya görə yaşı 65-i keçmiş şəxslər prezidentliyə namizəd ola bilməzdilər. YAP- ın bütün mübarizəsi ondan ötrü idi ki, Heydər Əliyev seçkilərə qatıla bilsin. İndi aydın oldumu ki, 1992-ci ilin o çətin aprel, may aylarında kimlər hakimiyyət uğrunda mübarizə aparırdı, kimlər Vətən torpaqları üçün şəhid olurdu?
O çətin zamanlarda İlham Əliyev nəinki Qarabağda, heç Azərbaycanda da deyildi. Rusiya və Türkiyə arasında bizneslə məşğul idi. Hətta ondan da xəbəri olmayıb ki, AXC-dən əvvəlki hakimiyyət xalq tərəfindən Şuşa və Laçının işğalına görə qovulmayıb. Tam əksinə, həmin vaxt AXC məhz Şuşa və Laçına olan real təhlükələrə görə prezident seçkilərinin təxirə salınmasını təklif etmişdi. Ancaq nə YAP-çılar, nə də Mütəllibovçular sakitləşmək bilirdi. Məhz Milli Məclidəki keçmiş kommunist əksəriyyət (Mütəllibov tərəfdarları) iyun ayının 7-nə prezident seçkiləri təyin etdi. Seçki keçirilməsinə əvvəlcə etiraz edən Əbülfəz Elçibəy seçkilər təyin olunduqdan sonra prezidentliyə namizəd oldu. O zaman Əbülfəz Elçibəyə xalq dəstəyi o qədər güclü idi ki, onun seçkidə qalib olacağı şübhə doğurmurdu. Ona görə də prezident seçkilərinə 3 həftə qalmış – may ayının 14-də Mütəllibov tərəfdarları Milli Məclisdə faktiki dövlət çevriliş etdilər. Mart ayının 6-da rəsmən istefa vermiş Ayaz Mütəllibov hakiyyətə qaytarıldı. Prezident seçkiləri ləğv olundu. Yalnız bundan sonra AXC dövlət çevrilişinin qarşısını almaq üçün Milli Məclisə ümumxalq yürüşü təşkil etdi. Mütəllibov və komandası hakimiyyətdən getdi. Seçki prosesi bərpa olundu.
Həmin dövrün milyonlarla şahidi hələ sağdır. Ona görə də İlham Əliyev həmin tarixi saxtalaşdırmaq üçün hətta həftədə bir dəfə də eyni sözləri desə, həmin tarixi saxtalaşdırmaq, Qarabağ savaşında Vətən naminə canından keçmiş minlərlə cəbhəçi şəhidin haqqını danmaq heç vaxt mümkün olmayacaq.
Qədirbilən xalqımız minlərlə şəhidinin haqqının danılması, Milli Azadlıq Hərəkatının lideri, vətənpərvərliyinə şübhə olmayan Əbülfəz Elçibəyin də “torpaqsatan” kimi təqdim olunması ilə heç vaxt barışmayacaq.