Xaqani Cəfərli
Rusiya iqtidarının Qərbin tezliklə Belarusda vəziyyəti köklü dəyişməyə cəhd edəcəyi ilə bağlı narahatlığı haqqında iki gün əvvəl yazmışdım. İndi məlum olur ki, Rusiyanın narahatçılığı əbəs deyilmiş.
ABŞ Konqressinin bir qrup üzvü Belarusda hakimiyyəti mənimsəmiş diktator Aleksandr Lukaşenkonu mühakimə etmək üçün beynəlxalq məhkəmə yaradılmasına çağırıblar.
Kristofer Smit, Bill Kitinq, Marsi Kaptur və Co Uilson tərəfindən Konqressdə yaradılmış “Belarusun dostları” qrupu belə bir təşəbbüslə çıxış edib. Nüfuzlu konqressmenlərin bu təşəbbüsünün tezliklə geniş dəstək qazanacağını proqnozlaşdırmaq olar. Çox güman ki, yaxın zamanda Avropa Parlamentində və Qərbin ayrı-ayrı ölkələrinin parlamentlərində belə təşəbbüslər olacaq.
“Belarusun dostları” qrupunda təmsil olunan konqressmenlər Lukaşenkoya qarşı yeni sanksiyaların tətbiq edilməsini də tələb edirlər. Konqressmenlər təklif edirlər ki, Lukaşenkonun maliyyə qaynaqlarını tamamilə məhv etmək üçün Belarusa qarşı sahəvi sanksiyalar tətbiq edilməlidir. Avropa Birliyində bir neçə ölkə eyni təkliflə çıxış edir. Belə görünür ki, Lukaşenkonun məsələsi sona yaxınlaşır. Əgər yaxın bir neçə həftədə təkif olunan sanksiyalar qəbul edilsə və Lukaşenkonu mühakimə edəcək beynəlxalq məhkəmə payızda yaradılsa, Belarusda hakimiyyət dəyişikliyi bir neçə ay ərzində başa çatacaq.
Lukaşenkonu mühakimə edəcək beynəlxalq məhkəmə necə yaradıla bilər?
Məlumdur ki, Rusiyanın avtoritar lideri Vladimir Putin Liviya diktatoru Müəmmər Qəddafinin qətlindən sonra hər bir avtoritar liderin hakimiyyətdən devrilməsini qorxu ilə qarşılayır və buna görə bütün gücü ilə dünyanın hər yerində avtoritar liderləri dəstəkləməyə çalışır.
Buna görə Rusiyanın BMT Təhlükəsizlik Şurası tərəfindən Lukaşenkonu mühakimə edəcək beynəlxalq məhkəmə yaradılmaısna imkan verməyəcəyi, özünün veto hüququndan istifadə edəcəyi şübhəsizdir. Ancaq belə məhkəmə bir neçə dövlət və Belarus xalqının yeganə ligitim təmsilcisi Svetlana Tixanovskayanın imzası ilə də təsis edilə bilər. Məlum olduğu kimi ikinci dünya müharibəsindən sonra Almaniya və Yaponiya üzərində qurulmuş məhkəmələr də bir neçə dövlət tərəfindən təsis olunub. Yəni, artıq bəşər tarixində bir neçə dövlətin beynəlxalq məhkəmə yaratmaq presidenti mövcuddur. Ona görə də Lukaşenkonu mühakimə edəcək beynəlxalq məhkəmənin BMT Təhlükəsizlik Şurası tərəfindən yaradılması zərurəti mövcud deyil. Əgər tərəqqipərvər bəşəriyyət qətiyyətli mövqe nümayiş etdirsə, Lukaşenkonun cinayətlərinə son qoymaq mümkün olacaq.
Belə bir ehtimal isə Moskvada artıq isterikaya səbəb olub. Rusiya Belarusdan sonra postsovet məkanında siaysi proseslərin Moskvanın nəzarətindən tam çıxacağından, demokratikləşmə prosesinin Rusiyanın daxilinə sıçrayacağından qorxur. Anadolu türklərinin dediyi kimi, qorxunun əcələ faydası yoxdur.