İctimai fəal Bəxtiyar Hacıyev
İlham Əliyev Azərbaycan cəmiyyətinə 1997-ci ildə Milli Olimpiya Komitəsinə prezident seçilərək təqdim olundu. Onun təyinatı həm idman sahəsində uğurlar qazanaraq onun uğurlu rəhbər imicini hazırlamaq, həm də “prezident” ifadəsi ilə adının hallandırılması üçün idi. Əliyev MOK-a prezident kimi rəhbər kimi təyin olunduqdan sonra 2016-cı ilə qədər Azərbaycan Olimpiadalarda artan istiqamətdə yüksəlişə başladı. 1 medaldan 3 medala, 5, 6, 9, 18 medala qədər qalxdı.
İlham Əliyev 2016 qalibləri ilə görüşdə 4 dəfə “Azərbaycan idman dövlətidir” deyib, bütün bu uğurları dövlətin, dolayısı ilə özünün apardığı uğurlu siyasətin nəticəsi kimi təqdim edib. Əliyev 18 medalı güclü iqtisadiyyatla, rayonlarda tikilmiş 40-dan çox olimpiya kompleksləri ilə əsaslandırıb.
Ancaq İlham Əliyevin bu uğurları dayanıqlı olubmu? Tokio-2020 nəticələri göstərdi ki, Əliyevin digər sahələrdə uğur kimi təqdim etdiyi göstəricilər kimi idman sahəsindəki göstəricilər də görüntüdə uğur, amma dayanıqlılıq baxımından uğursuzluq olub.
Rio 2016-da 18 medaldan 10-u legionerlərin hesabına qazanılıb. (8 qızıl və gümüşdən 5-i legionerlərin hesabına). Olimpiadada iştirak edən 56 idmançıdan 32-si legioner olub, Azərbaycanın yarışdığı 17 idman növündən 10-da təmsilçilərimiz tam olaraq legionerlərdən ibarət olub.
Azərbaycan dayanıqlı idman siyasəti aparmaq əvəzinə neft pulları hesabına xaricdə uğurlu idmançıları milliləşdirməklə nəticələri şişirdib.
Tokyo 2020-də Gürcüstan 2 qızıl, 5 gümüş və bir bürünc medalla ölkələr sırasında 30-cu yerdə qərarlaşıb. İdman ölkəsi və regionun lider dövləti adlandırılan və əksər rayonlarında Olimpiya Kompleksləri tikilmiş Azərbaycan isə qonşumuzdan 37 sıra geridə qalaraq 67-ci yerdə.
Gürcüstanın Tokyo-2020də 8 medalçısından yalnız biri legionerdir, Azərbaycanın isə 7 medalçısından 4-ü. Gürcüstan həm medal sayına, həm medalların əyarına görə 2016-dakı nəticələrdən daha uğurlu təmsil olunub. Azərbaycan isə medal sayına görə də, əyarlarına görə də heç 2016 nəticəsinin yarısına belə çatmayıb.
Azərbaycanda 20-dən çox federasiyanın prezidenti idmançı yox, hazırda vəzifədə olan məmurlardan ibarətdir. Federasiya prezidentlərinin bəziləri 25 ildən çoxdur ki, eyni vəzifədədirlər.
Milli Olimpiya Komitəsinin prezidenti Azərbaycan prezidenti İ.Əliyevdir, 17 nəfərlik İcraiyyə Komitəsindən ikisi İ.Əliyev və M.Əliyevadır, icra aparatında baş katibin müavini isə prezidentin bacısı oğlu Azər Mahmud oğlu Əliyevdir.
Prezidentliyə neft pulları hesabına artan idman nəticələri ilə gələn İlham Əliyevin bütün sahələrdəki dayanıqlı olmayan işləri də idmanla çöküşə getməyə başlayıb.