AXCP Rəyasət Heyətinin üzvü Fuad Qəhrəmanlı
Azərbaycan Krım Platformasına qoşulmadı. Bu platforma çərçivəsində bu gün Kiyevdə 45 ölkənin iştirakı ilə beynəlxalq zirvə toplantısı keçiriləcək. Krım Platformasının hədəfi Kırımın Rusiya işğalından azad edilərək yenidən Ukraynaya qaytarılması olsa da, bu tədbirin məqsədi heç də bununla məhdudlaşmır. Əsas məqsəd, Rusiyanın imperial iddialarını cilovlamaq və Putin hakimiyyətinin postsovet məkanında həyata keçirdiyi ilhaq siyasətinə qarşı beynəlxalq müqavimət koalisiyası formalaşdırmaqdır. Ukraynanın təşəbbüsü və Qərbin ciddi dəstəyi ilə yaradılan platforma, qlobal geosiyasi bir layihədir.
✅ İndi təsəvvür edin, Qarabağda Rusiya sülhməramlılarının özbaşınalığından və Moskvanın Ermənistan vasitəsi ilə həyata keçirdiyi dolayı işğal siyasətindən əziyyət çəkən Azərbaycanın bu tədbirə qatılmaması nə deməkdir? Bunu heç bir arqumentlə əsaslandırmaq mümkün deyil. Hətta bu günlərdə dövlət başçısı İlham Əliyevin Rusiya Müdafiə naziri Şoyqunun Ermənistan ordusunun silahlandırılacağı ilə bağlı dediklərinə etirazından, rus sülhməramlılarının Qarabağda öz vəzifələrini yeri yetirməməsi barədə narazılığını dilə gətirməsindən sonra gözləmək olardı ki, Krım Platforması Azərbaycan rəhbərliyi üçün bir cavab şansı kimi dəyərləndiriləcək.
Məhz bu platformaya qatılmaqla, Rusiyanın işğal siyasətinə qarşı əks cəbhədə yer almaqla Azərbaycan həm Putinin təhdidlərinə və aqressiyasına qarşı əks cavab tədbiri görmüş olardı, həm də Rusiya işğalına qarşı olan ölkələr klubuna qoşulub özü üçün xarici müttəfiqlər qazanmağa çalışardı. Nəzərə alsaq ki, ən yaxın strateji müttəfiqimiz olan Türkiyə də Krım Platformasında fəal iştirak edir, o zaman aydın olar ki, biz öz müttəfiqimizlə bir cinahada yer almaqla, həm də Rusiya qarşısında öz mövqelərimizi daha da möhkəmləndirə bilərdik.
✅ Ancaq biz nə etdik? Özümüzü bu mühüm beynəlxalq platformadan kənarda qoyduq ki, birdən bu mövqe Putinin xoşuna gəlməz, əlahəzrət qəzəblənər. Putin onsuz da Jirinovskinin dili ilə bizi hədələyir, Rusiya “sülhməramlılarının” icazəsi ilə Qarabağ separatçılarına hərbi yardım göndərilir, Moskva rəsmi səviyyədə Ermənistanı silahlandıracağın deyir və bununlarla bağlı Azərbaycanın etirazına Rusiya XİN sözçüsündən “əcəb edirik” cavabı gəlirsə, onda daha çəkinəcəyimiz daha nə qaldı ki? Daha nədən qorxur Azərbaycan iqtidarı? Rusiya onsuz da bildiyini və istədiyin edirsə, düşmən ölkəni silahlandırmaqla revanş müharibəsinə hazırlıq görürsə, biz nəyi gözləyirik, niyə əks tədbirlər görmürük? İqtidardan kimsə çıxıb buna izah verə bilərmi? Görmədiniz ki, əks tədbirlər görülmədən Putin İlham Əliyevin sadəcə müsahibədə səsləndirdiyi etirazlara, necə aşağılayıcı bir formada XİN sözçüsü Zaxarovanın dili ilə “yaxşı edirik” cavabını verdi.
✅ Burdan nəticə çıxır ki, Azərbaycan tərəfin ən yüksək səviyyədə bildirdiyi etirazların Putin üçün heç bir dəyəri yoxdur. Diplomatiya sadəcə sözləri deyil, həm də əks gedişləri nəzərdə tutmalıdır. Bu əks gediş kombinasiyaları yoxdursa, demək ki, Rusiya Azərbaycana münasibətdə yanaşmasını nəinki dəyişməyəcək, əksinə, dilsiz – ağızssız, çəkingən və üzüyola Azərbaycan iqtidarının üstünə gəlməkdə, milli maraqlarmızı qəsb etməkdə davam edəcək. Bunları düşünmək, narahat olmaq yerinə, gedib mənasız “Qoşumayanlar” həraktında Maduronun böyründə elə bərk – bərk durublar ki, sanki, ölkəmiz ətrafında “qala müdafiəsi” qurublar.
Sözlərin bitdiyi yerdəyik. Diplomatiyanın “d” hərfinin belə bu hakimiyyətin xarici siyasətinə dəxli yoxdur. Siyasəti bilmirlər. Bacardıqları indiyədək ölkənin milli maraqlarını hər üstümüzə çəmkirənə peşkəş etməklə, Azərbaycandan pay qoparmaq istəyənlər üçün özlərini sərfəli hakimiyyət kimi göstərmək olub. Balanslı siyasət dediki də məhz əslində milli maraqlarımızı balanslı şəkildə ona buna güzəştə getmək olub.
✅ İndi buyurub 10 noyabrdan bu gnə qədər Rusiyaya etdiyimiz güzəştlərin qarşılığında, bizə nə verildiyini, ölkə olaraq nə əldə etdiyinizi desinlər. Varmı dövlət olaraq güzəştlər qarşılığında aldığımız bir nəticə? Yoxdur, əksinə, itirdiklərimiz göz qabağında.
Qarabağda Rusiya öz ərazisi kimi davranır, qondarma rejimi dirildir, onu legitimləşdirməyə çalışır, erməniləri məskunlaşdırır, Ermənistanı açıq aşkar yeni müharibə üçün silahlandırır. Bütün bunlardan sonra Rusiyanın aqressiv siyasətinə qarşı durmaq, kombinasiyalar düşünmək, beynəlxalq müdafiə mexanizmlərində fəal iştirak etmək əvəzinə, Krım Platforması kimi imkanlardan istifadə etməmək, sadəcə bu ölkədə demokratik seçki kimi, diplomatiyanın da “gorbagor” olması deməkdir.