Milli Şuranın Koordinasiya Mərkəzinin üzvü Rafiq Manaflı
44 günlük müharibənin hərbi rəhbərliyini Bəxtiyar hoca, siyasi rəhbərliyi Ərdoğan həyata keçirib. Erməni himayədarlarının bütün təzyiqlərinin qarşısında o dayanıb, müdaxilə ilə təhdid edənlərə “Qarabağa üçüncü qüvvə girəcəksə qarşısında Türkiyəni görəcək” deyib dayanıb. Çavuşoğlu Ankara-Bakı yolunu su yoluna döndərib, hansısa təzyiq bizimkiləri karıxdıran anda başlarının üstünü alıb.
İlham Əliyev bu müharibədə dünya müharibələri tarixində görünməmiş bir ilkə imza atıb. Ali Baş Komandan olaraq müharıbə aparan ölkənin diktorluğunu edib, azad edilmiş məntəqələri elan etmək qədər ağır bir işi öz üzərinə götürüb, lap II Dünya müharibəsində məşhur sovet diktoru Levitan kimi. Sonda məlum oldu ki, onu da yaxşı yerinə yetirməyib, tənbəllikdənmi, qəsdənmi vaxtında elan etməyib və nəticədə azadlığı elan olunmayan torpaqları geri qaytarası olub.
II Qarabağ savaşında Azərbaycan ordusu misilsiz rəşadət göstərib, torpaqlarımızı işğaldan azad edib, böyük hərbi uğurlara nail olub. Müzəffər – Azərbaycan Ordusudur.
Azərbaycan xalqı bütün varlığı ilə ordumuzun yanında olub. Gənclərimiz hərbi komissarlıqların qapılarını dağıdıb, döyüşlərə can atıb. Ölkənin hakim elitası və məmur kastası istisna olmaqla bütün xalq bir nəfər kimi övladını, malını, pulunu, bacardığı bütün dəstəyi müharıbədən əsirgəməyib. Müzəffər – Azərbaycan xalqıdır.
Və prezident kimi siyasi uğursuzluğu bir kənara qoysaq, Ali Baş Komandan olaraq hərbi baxımdan İlham Əliyev də müzəffərdir.
Bəs niyə müzəffər kimi təqdim edilən yalnız İlham Əliyevdir? Niyə bu müharıbənin həqiqi müzəffərləri – Azərbaycan Ordusunun və Azərbaycan Xalqınin şəni ucaldılmır, şəhid ailələrinə hörmət qoyulmur, qazilərimiz intihara məcbur edilir? Axı indi, siyasi nəticələrin doğurduğu bu ağır, mürəkkəb şəraitdə qalib, özünə inamlı xalq hər cür silahdan daha əhəmiyyətli, daha güclüdür.
Amma olmaz. Qalib xalqı idarə etmək üçün özün QALİB olmalısan, dövlətçi, xalqçı olmalısan. Dövləti dədənin malı sanmamalısan. Qalib, müzəffər xalqa bu gün üzləşdiyin siyasi uğursuzluğu yedizdirmək mümkün deyil.
Ona görə xalq aşağılanmalı, sındırılmalı, heçə sanılmalıdır. Nəticəsi nə olacaq, meydanda özünün tam iradəsizliyinlə tək qalacaqsan – cəhənnəmə ki, təki taxt qorunsun.
Müzəffər yalnız bir nəfər olmalıdır. Nə qədər haqqı çatır, ya çatmır, bunun heç bir əhəmiyyəti yoxdur. Regionda siyasi liderliyimizdən, iqtisadi qüdrətimizdən, mənfi 5%-lik işsizlikdən, AXCP-Müsavat cütlüyündən o qədər qırmızı yalanlar eşitmişik ki. Müzəffər də onlardan biri.
Qusar 18.08.21