Kitabı kababdan çox sevmək…
İlham Hüseyn
Hadisələri dərindən analiz edəndə, yaşadığımız ölkədəki neqativlərə nəzər salanda aydın görünür ki, cəmiyyət çox məlumatsızdır. Bizə elə gəlir ki, hamı hər şeyi bilir. Amma diqqətlə araşdıranda görürük ki, ölkədə korrupsiyanın olduğunu, seçkilərin saxtalaşdırıldığını, hüquqsuzluğun hökm sürdüyünü bilmək, hələ hər şeyi bilmək anlamına gəlmir. Yəni, gözümüz gördüyünü bilirik, amma bunun nəticələrini dərk etmirik, üzərimizə düşən məsuliyyəti anlamırıq. Elə faciə də qulağımızın eşitdiyi, gözümüzün gördüyü şeylərlə kifayətlənməyimizdən başlayır.
Məsələn, AzTv-də analoqsuz inkişaf nağıllarına qulaq asırıq, səlahiyyətli şəxslərin bəzəkli rəqəmlər səsləndirməsini dinləyirik, Qarabağla bağlı bizə xoş gələn informasiyaları eşidirik və qane oluruq. Eləcə də bütün sahələrdə başverənlərə belə yanaşırıq. Oxumaq istəmirik, oxumaq tələbatı hiss etmirik, oxumağa can atmırıq. Ümumiyyətlə, normal insan, normal vətəndaş kimi formalaşmaq üçün oxumaq ən vacib qidadı, vitamindi, həyat düsturudu.
Aristotel deyirdi ki, oxuyub yazanla oxumayıb yazmayan arasındakı fərq, ölülərlə dirilər arasındakı fərq qədərdir. Rey Bredberi isə “kitabları yandırmaqdan daha pis şey onları oxumamaqdır” deyirdi.
Məsələ burasındadır ki, biz oxumadıqca aldanmaq üçün hazır məhsula çevrilirik. Və ən dəhşətlisi budur ki, bilmədiyimizdən xəbərsizik. Hər şeyi bildiyimizi zənn edirik.
Mişel Monten yazırdı ki, az bildiyini başa düşmək üçün çoxlu oxumaq lazımdır.
Didro isə haqlı olaraq “adamlar mütaliədən əl çəkəndə fikirləşməkdən də qalırlar” söyləyirdi.
Bəlkə də bütün bunlar bizə adi görünür. Amma biz oxumağa cəhd etməliyik. Cəmiyyətin müalicəsi oxumaqla mümkündür. Oxuduqca ağla qaranı, xeyirlə şəri, haqqla nahaqqı daha asan seçə biləcəyik. Oxumaq vərdişimizi artırsaq, adamlarla yersiz mübahisələrə girişmərik, dələduz “xadimlərin” tələsinə düşmərik, ləyaqətli adamlara haqsızlıq etmərik.
Franklin deyirdi ki, bir ölkədə oxumağa qarşı istək artmazsa, qəflət və ondan yaranacaq fəlakətlər azalmaz.
Biz kitabı kababdan çox sevəndə qalib gələcəyik. Mədəmizin deyil, başımızın doymasından məmnun olanda yenilməz olacağıq.