AXCP Rəyasət Heyətinin üzvü Fuad Qəhrəmanlı
Ağdərə ərazisində ermənilərin həbs etdiyi Azərbaycan hərbi qulluqçusu ilə bağlı məsələ sadə bir olay deyi. Bu olayın siyasi tərəfləri də var və təəsüf ki, hökumət məsələnin bu tərəflərini görə bilmir.
Əgər hərbi qulluqçu Cəmil Babayev qondarma rejimin qanunsuz silahlı birləşmələri tərəfindən saxlanılmış olsaydı, bunu hərbi konteksdə təqdim etmək olardı. Ancaq, Azərbaycan əsgərinin separatçı rejimin “polisi” tərəfindən həbs edildiyini və ona cinayət işi açıldığını deməklə, ermənilər öz dövlət təsisatları olan qondarma bir rejimin varlığını gündəmə gətirmək istəyirlər. Ona görə də indi ermənilər bu məsələdən istifadə edərək, Azərbaycan əsgərinin hərbi əsir kimi yox, sərhəd pozmuş cinayətkar kimi saxlanıldığını deməklə, öz iddalarına legitimlik qazandırmağa çalışırlar.
Bu deyilişlə eyni zamanda Azərbaycan ərazisində bu qanunsuz rejimin guya ki, öz ərazisi və dövlət sərhəddi varmış kimi bir görüntü də yaratmağa çalışırlar.
🔸 Bəs biz nə edirik? Ermənilərin əsir götürdüyü əsgərimizin qaytarılmasını dərhal rus hərbiçilərindən tələb etmək əvəzinə, ona cinayət işi açıb susmuşuq. Təsəvvür edin, işbilməzlik və siyasi naşılıq o səviyyədədir ki, əsgərimizin qeyri qanuni saxlanılması barədə cinayət iş açmaq yerinə, qondarma rejimin həyata keçirdiyi əməli cinayət fəaliyyəti kimi xarakterizə etməkdənsə , öz əsgərimizə cinayət işi açıblar.
🔸 Bundan əlavə ermənilərin saxladıqları əsgərin Azərbaycan tərəfindən rəsmi şəkildə hərbi əsir elan olunması da yaddan çıxıb. Əgər, Azərbaycan düşmən əlində olan öz əsgərinin statusunu müəyyənləşdirmirsə, o zaman qondarma rejimin onu sərhəddi pozan cinayətkar hesab etməsi faktını qəbullanmış kini görünürük.
Necə ola bilər ki, iqtidarda kimsə bu mühüm nüansları görməmiş olsun? Ona görə də rəsmi qurumlar dərhal buraxdıqları səhvi düzəltməlidirlər.