Avqustun 26-da baş vermiş partlayışlardan sonra yanğının söndürülməsi davam edir
Qazaxıstanın cənubunda hərbi bazada partlayışlarda beş nəfər həlak olub, 90 nəfər xəsarət alıb. Ölənlərin dördü hərbçi, biri yanğınsöndürəndir. Ölkənin müdafiə naziri istefa ərizəsi yazıb.
Nazir Nurlan Yermekbayevin avqustun 27-də mətbuat konfransında deməsinə görə, partlayıcıların saxlandığı hərbi obyektdə yanğının səbəbi bəlli deyil. O, qəsdən yandırma, sabotajın istisna olunmadığını söyləyib.
Beş hərbçi yanğınla mübarizədə həlak olub. Yermekbayev deyib ki, anbardakı partlayıcılar Aris şəhərindən gətirilibmiş. 2019-cu ildə həmin şəhərdə oxşar insidentdə dörd nəfər həlak olmuşdu.
Yermekbayev-in AzadlıqRadiosu-nun Qazaxıstan xidmətinə deməsinə görə, hadisədən sonra istefa ərizəsi yazıb, son qərarı ölkə rəhbərliyi verəcək.
***
Qazaxıstanın cənubundakı Jambil vilayətində sursat anbarında bir neçə partlayış baş verib, azı 60 nəfərin xəsarət aldığı bildirilir.
Avqustun 26-da baş vermiş partlayışlardan sonra yanğının söndürülməsi davam edir.
Ərazinin təxminən 1 kilometrliyində yerləşən dörd kəndin sakinləri köçürülüb. Məlumatı Müdafiə Nazirliyi yayıb.
Xilasetmə işlərinə yüzlərlə hərbçi, polis əməkdaşı, tibb işçisi cəlb olunub.
Prezident Qasım-Jomart Toqayev Twitter-də yazıb ki, xəsarət alanların azı 30 nəfəri hərbçilər və fövqəladə xidmət əməkdaşlarıdır.
Azadlıq radiosu