Hüquq müdafiəçisi Anar Məmmədli
Əfqanıstan və Ermənistanda bu günlərdə yaşanan iki olaydan ölkəmizin vətəndaşları və siyasi qrupları bəzi dərslər çıxara bilər.
Hazırda Taliban Əfqanıstanın Pəncşir vilayəti istisna olmaqla bütün ərazisinə nəzarət edir. Əsasən taciklərin yaşadığı bu bölgədə Əhməd Məsud (oğul) və Əmirulla Saleh (vitse-prezident) anti-Taliban müqavimət hərəkatına liderlik edirlər. Son bir həftə ərzində taliblərlə iki hərbi qarşıdurma yaşanıb və hər ikisində taliblər geri çəkilməyə məcbur olublar. Hazırda tərəflər arasında gizli danışıqların getdiyi bildirilir.
Dünən Əhməd Məsudun bir açıqlaması diqqətimi çəkdi. Deyir ki, biz sabitlik naminə hüquq və azadlıqlarımızdan imtina edə bilmərik. Etnik/dini azlıqların və qadınların hüquqlarına təminat verməyən siyasi qüvvənin vəd etdiyi sabitlik özünü hüquqsuz şəkildə ölkəyə həbs etməkdir. Bizim ölkəyə bənzəmirmi bu durum!?
Ermənistan parlamentində daşnaklarla islahatçılar arasında yaşanan gərginliyi və əlbəyaxa qarşıdurmanı ölkəmizdə gülüşlə izləyənlər çoxdur. Təbii ki, olayların millətçi duyğular üzərindən başlaması, bir-birini satqın və xəyanətkar adlandırmaları gülüş və ikrah doğurur. Amma siyasi qütbləşməni parlament divarları arasından kənara çıxarmamaq, vətəndaş qarşıdurmasını parlament müzakirələri ilə soyutmaq da hünər istəyir. Bu yolla tədricən siyasi böhranı çözüb dinamik siyasi məcraya qayıtmaq olar.
Əfsus ki, biz bunları 27 il əvvəl bacara bilmədik.
Bizim Əfqanıstandan çıxarcağımız dərs budur ki, 16 il ərzində bu ölkədə sabitliyi dəstəkləyən Qərb korrupsiyaya, etnik-regional müxtəlifliyə və yarıtmaz idarəçiliyə ciddi yanaşmadı. Əslində sabitlik o zaman yaranır ki, cəmiyyətdə fərqli siyasi qütblər arasında qarşıdurma seçkilər yolu ilə çözülsün.
Seçkiləri küfr və ya əhəmiyyətsiz hesab edən mürtəce siyasi qüvvə ilə masa arxasında oturmaq olmaz. Əks halda dünyada yaydığın və təbliğ etdiyin prinsiplərdən imtina etmiş olursan. Və milyonlarla insanı mürtəce qüvvələrin qulluğuna təslim edirsən.
Bizdə də 1993-cü ilin iyun günlərində siyasi qütbləşmənin yeganə çözüm yolu ədalətli parlament seçkiləri idi. Bunu ya 4 iyunadək, ya da qiyamdan dərhal sonra siyas böhranı çözmək üçün keçirmək lazım idi.
“Ölkə parçalandı”, “sabitlik pozuldu”, “erməni Gəncəyə girəcək” kimi ididalar heç bir halda vətəndaşların siyasi azadlıqlarından daha önəmli ola bilməz. Kimin haqlı olub-olmadığına, kimin iqtidarda qalıb-qalmamağına və kimin qərarverici statusda qalıb-qalmamasına vətəndaşlar azad və ədalətli şəkildə qərar verirsə, siyasi böhran həllini tapır, siyasi qütbləşmə aradan qalxır.