Milli Şuranın sədri, professor Cəmil Həsənli
Prokuror Niyaməddin Əhmədova 15 il cəza istəyib. Adam dövlət çevrilişi filan etməyib “dövlət ittihamçısı” ona bu qədər cəza istəyir. Görən etsəydi nə qədər cəza istəyəcəkdi. Əslində, Azərbaycanda “dövlət” hansı vəziyyətdə, hansı rəzalətin içindədirsə, onun “ittihamçısı” da, onun adından ittiham irəli sürən də eyni vəziyyətdədir. Dövləti, onun ittihamçısını da bu rəzalətin dibinə salan İlham Əliyevdir.
Niyamədin vətənsevər bir gəncdir. Mən özüm-özümə fikirləşirəm ki, 44 günlük müharibə zamanı o, azadlıqda olsaydı, harada olardı. Heç şübhəsiz ki, ya şəhidlərin, ya da qazilərin sırasında olacaqdı. Özləri də, övladları da vətən müharibəsi zamanı daldalanmış fərarilər çiyinində ağır atıcı silah gəzdirib vətəni müdafiə etmiş Niyaməddin Əhmədov kimi fədakar bir gənci saxta bir böhtanla mühakimə edirlər, ona torba tikirlər.
Niyaməddin Əhmədov hansısa günahın sahibi deyil. Onu Xalq Cəbhəsinin sədri Əli Kərimliyə yaxınlığına, sədaqətinə görə şərləyib saxta bir ittihamla tuturlar. Aqil Əli Məhərrəm də, Saleh Rüstəmli də cəbhə sədrinə sədaqətinə görə olmayan suçlarının cəzasını çəkirlər. Paşa Umudovu da ona görə həbs ediblər, Ruslan Əmirovu da ona görə həmişə həbs təhdidi altında saxlayırlar. Əlzamin bəy də üzvü olduğu təşkilata sadiqliyin cəzasını çəkir. Cəbhəyə rəhbərliyinin yarıdan çoxu da ona görə həbs düşərgələrindən keçir. Ötən ilin iyulunda Qarabağa dəstək mitinqi də cəbhəçilərə qurulan bir tələ idi. Əliyevin yeritdiyi, təqib, cəza, zorakılıq, ayrıseçkilik siyasəti cəbhəçiləri cəmiyyətdə ayrı bir sosial-siyasi qrupa çevirib. Belə isi onlar üçün ayrı qanunlar, ayrı cinayət məcəlləsi qəbul edin. Özünüzü də belə rüsvayçı, misgin duruma salmayın.
Maşınla 3-4 nəfəri öldürən harın məmur övladına 3-4 il iş verib, 3-4 aydan sonra azad edirlər. Məqsədli şəkildə adam öldürənə 8-10 il iş verirlər. Amma günahı sübuta yetirilməyən, xaricdə sosial yardımla yaşayan birisindən “maliyyəyə yardımı” alıb gülməli, gülməli olduğu qədər də mücərrəd bir böhtanla “ittiham” edilən cəbhəçi Niyaməddin Əhmədova 15 il cəza istəyirlər. Bu da bunların ədalət meyarı, hüquq düşüncəsi. Vallah Femida sağ olsaydı sifətinizə tupürərdi! Əlindəki ədalət rəmzi olan tərəzini boş başınıza keçirərdi! Onu bu ölkədə siz dəfn etmisiniz, İlham Əliyev quyulayıb.