AXCP sədrinin ictimai əsaslarla mühafizəçisi Niyaməddin Əhmədova uzun müddətə həbs cəzası istənilməsi ilə bağlı Milli Şuranın bəyanatı
Hakimiyyətin prinsipial müxalifətə qarşı repressiyası davam edir. Belə ki, AXCP sədrinin ictimai əsaslarla muhafizəçisi Niyaməddin Əhəmədova qarşı məhkəmədə dövlət ittihamçısı ona 15 il həbs cəzası istəyib. Azərbaycan təcrübəsini nəzərə alsaq, sifarişli məhkəmənin də Niyaməddin bəyi uzun müddətə azadlıqdan məhrum edəcəyi gözləniləndir.
Niyaməddin Əhmədov ötən ilin aprelində saxlanılıb. Əvvəlcə inzibati həbs cəzası alsa da, vaxtı bitən ərəfədə ona absurd şəkildə “terroru maliyyələşdirmə” ittihamı irəli sürülüb və barəsində uzun müddətə həbs-qətimkan tədbiri seçilib. Sonradan özünün verdiyi ifadələrlə məlum olub ki, Niyaməddin bəy hələ inzibati həbsdə olduğu vaxtda DTX-ya aparılaraq işgəncəyə məruz qoyulub. Onu inzibati həbsdə ola-ola qanunsuz şəkildə günlərlə DTX-da işgəncə altında saxlayıblar.
Barəsində cinayət işi açıldıqdan sonra da Niyaməddin bəy fiziki zorakılığa və mənəvi təzyiqə məruz qalıb. Məhkəmə prosesində özünün verdiyi ifadəyə görə, ona hətta Penitensiar Xidmətdə də, Kürdəxanıdakı istintaq təcridxanasında da (bilavasitə rəisin otağında və şəxsən iştirakı ilə) işgəncə verilib. Bütün bu dövrdə Niyaməddin bəydən işgəncə və təzyiq vasitəsilə AXCP sədri Əli Kərimli əleyhinə yalan ifadə almaq istəyiblər, lakin o, iradə və dəyanət göstərərək, bunu etməyib.
Niyaməddin Əhmədovu saxlanıldığı ilk günlərdən bəri mənəvi təzyiq məqsədilə öz ailəsilə telefon danışıqlarından da məhrum ediblər. Bu dövrdə ona qarsı atasının pisləşən səhhətini də mənəvi təzyiq vasitəsinə çevirmək istəyiblər. Bütün bu fiziki və mənəvi işgəncələrə baxmayaraq Niyaməddin bəy sifarişli istintaqın saxta ittihamlarını qəbul etməyib, məhkəmənin gedişində bu ittihamları darmadağın edib.
Milli Şura bildirir ki, hakimiyyət Niyaməddin Əhmədovu məhz AXCP üzvü, üstəlik partiya sədri Əli Kərimlinin mühafizəçisi olduğu üçün cəzalandırır. Xatırlatmaq yerinə düşər ki, Niyaməddin Əhmədov 19 oktyabr 2019-cu il mitinqində hakimiyyət qüvvələrinin bütün cəhdlərinə baxmayaraq, son ana qədər Əli Kərimlinin yanından ayrılmamışdı. Həmin mitinqdə hakimiyyət qüvvələrinin Əli bəyi nəhayətdə necə təkləyərək həbs etdiyi və ağır işgəncəyə məruz qoyduğu da hamıya məlumdur.
Milli Şura bəyan edir ki, Niyaməddin Əhmədov kimi mərd, əqidəli və prinsiplərinə sadiq bir gənci məhz siyasi qisasçılıq hissi ilə haqsız yerə belə ağır cəzalandırmaq İlham Əliyev hakimiyyətinə yalnız özünün tarixdəki qara yerini dərinləşdirməyi nəsib edə bilər. Milli Şura hakimiyyətdən tutduğu cinayətcəsinə səhv yoldan dönməyi, məhkəmənin Niyaməddin Əhəmədov barəsində haqq etdiyi ədalətli hökm çıxarmasına, ona bəraət verməsinə imkan yaratmağı tələb edir. Niyaməddin bəy suçsuzdur və əgər məhkəmə ona həbs cəzası verəcəksə, bu, bilavasitə siyasi hakimiyyətin ən üst səviyyədən verilən sifarişi kimi qəbul ediləcək. Belədə hökmün məsuliyyəti də bütövlükdə siyasi hakimiyyətin və şəxsən İlham Əliyevin üzərində qalacaq.
Milli Şura demokratik dünyanı və Azərbaycan xalqını baş verənlərə seyrçi qalmamağa, İlham Əliyev rejiminin siyasi qisasçılıq hissi ilə daha bir günahsız insanı haqsız yerə həbsə göndərməsinə uca səslə etiraz etməyə çağırır.
Niyaməddin Əhmədova və bütün siyasi məhbuslara azadlıq!