Камбағалликни қисқартириш ва бандлик бошқармасидаги адолатсизлик

Тошкент шаҳар Камбағалликни қисқартириш ва бандлик бошқармасида ҳар ой ажратиладиган рағбатлантириш пуллари очиқчасига адолатсиз ва танлаб тақсимланаётгани ҳақида Элтузга жиддий мурожаат келиб тушди. Мурожаатда айтилишича, ушбу ҳолат йиллар давомида тизимли тус олган.

Мурожаат муаллифининг билдиришича, бошқарма бошлиғи Якуб Бабажанов ҳар ой ҳокимият томонидан ажратиладиган рағбатлантириш маблағларини “барча ходимлар 400 фоиздан рағбатлантирилди” деб расмийлаштиради. 

Аммо амалда манзара мутлақо бошқача: ўзига яқин, “ишонган” ходимлар 400 фоиздан (тахминан 18–25 миллион сўм), қолган, раҳбарга ёқмаган ходимлар эса тирикчилик учун зўрға етадиган “чой чақа” билан чекланади.

Бу ҳолатда бошқарма раҳбари кимни алдаяпти — оддий ходимларними ёки юқори раҳбариятни? Ёхуд иккаласини ҳамми?

Мурожаатчи текширув ўтказилса, барча ҳолатлар ҳужжатлар орқали осонгина фош бўлишини таъкидлайди. Унинг сўзларига кўра, рағбатлантириш пуллари бўйича ҳужжатларда қасддан сохталаштириш аломатлари мавжуд бўлиб, бу Жиноят кодексининг 228-моддаси билан боғлиқ ҳуқуқий баҳони талаб қилади.

Муаллиф ушбу бошқармада ишлаган даврида кўплаб адолатсизликларга гувоҳ бўлганини, айнан шу сабабли “елкасини чуқур кўрсатиб” иш жойини тарк этганини яширмайди. Унинг айтишича, бу тизимда кадрлар қўнимсизлигининг юқорилиги ҳам айнан шундай муносабатга боғлиқ.

Мурожаатда келтирилган энг оғриқли мисоллардан бири эса вилоятдан келиб ишлаётган аёл ходим тақдири билан боғлиқ. Ушбу ходимга атига 50 фоиз рағбатлантириш пули берилган. Аёлнинг “агар 200 фоиз олсам (тахминан 10 миллион сўм), марҳум ота-онам қабрига қабртош қўймоқчи эдим” деган сўзлари мурожаат муаллифини сукутни бузишга мажбур қилган.

Мурожаат Тошкент шаҳар ҳокими Шавкат Умурзоқов номига йўлланган. 

“Ўзбекистонда вазирликлар ва уларнинг қуйи тузилмаларидаги бундай ҳолатларга чек қўя оладиган, ҳақиқатан мустақил ва мард ҳуқуқни муҳофаза қилувчи орган борми?” дея савол қўяди муаллиф.

Ушбу иддаолар жамоатчилик эътиборида. Масъул идоралардан эса навбатдаги “қуруқ изоҳ” эмас, аниқ текширув ва қонуний чоралар кутилмоқда.