جوازة مع ايقاف التنفيذ
كان ردها انا اتجوزت عشان مبقاش لوحدى وبردو بقيت لوحدى
ده خلانى افكر شويه في معاناة الست اللي بتتجوز وبعد فتره جوزها بيسافر ، عشان حاجات كتير ، اولها طبعا صعوبة المعيشة في مصر
وتيجي بعدها ظروف تانية زي تأمين مستقبل الأولاد
أولويات كلها مادية ، و للأسف بتكون النتيجة بتاعتها انها بتقول الجمله اللي فوق دى او بتتحول بردو لام واب واحيانا اب بس.
احلامها كلها بتبقي عباره عن الاجازة اللي هينزل فيها جوزها من السفر ومش محتاجة اقولكم ان الغربة بتاكل في عمرها وعمر جوزها ازاى
وطبعا فكرة انها تسافر ليه صعبة عشان معنى انها تسافر انها غربة مش جايبة همها
من الاخر المرة دى حابه نحكي عن الغربة بالنسبة للزوجة بس
انا حابه نحكى كمان عن تأثيرها على الولاد والاب
جمله سمعتها من اب مغترب انه مش عايز ولاده يكبروا الا اما يرجع عشان فكرة انه تقتصر علاقته بيهم على جهاز كومبيوتر او موبايل مرعبة
انى اختصر وجود شخص في حياتى على وجوده علي شاشه رقمية ده في حد ذاته شئ مرعب فعلا
نرجع للزوجه اللى بتقرر انها تقوم بدورين الاب والام في ظل غياب الزوج واللى مع طول الفترة بيصعب عليها انها ترجع تلتزم بدورها الطبيعي كست فقط او انثي فقط
في ظل الظروف اللي بتعيشها البلاد حاليا اتحولت اغلب السيدات في مجتمعنا العربي لزوجات مع ايقاف التنفيذ
في لوقت اللى بيطالب فيه شيوخ بجماع الوداع بعد موت المرأة
اقترح عليهم ان يفتوا بفتوى تبيح للزوجة السفر لزوجها المغترب
او تبيح لهم علاقة سوية لا اليكترونية
او حتى علي اقل تقدير تبيح لطفلة ان تبكي في حضن ابيها و تبيح للاب ان يغمض جفونه ليلا وهو يعلم ان اطفاله علي بعد خطوات من محط راسه
لكن الغربة ليست اختيار او رفاهية بل هى واقع فرضته علينا ظروف اقتصادية صعبة لا يجدى معها جميع الحلول
ولكن ما هى الحلول الممكنة لهذه الظاهرة ؟؟
في البدايه اذا كنتي من حديثى الزواج و ظروف عمل الزوج تقتضي السفر للعمل بشكل متقطع فضرورى وضع أسس تضمنلك ان غيابه ليس بصور دائمة مع امكانية توفير معيشة لكى بجواره اما ان كان سفر دائم اعتقد ضرورى يحدد بعدد من السنين المتفق عليها حتى لا تجدى عمرك ينقضى وانتى في انتظار اجازته القادمه
لازم نفهم كويس جدا ان الزواج هو علاقة شراكة بين اتنين اتفقوا علي اقامة روابط اسرية بينهم اساسها القرب والصداقه والتواصل الدائم والمشاركه كل بدوره
الام والاب في حاله تغيب ضلع من هذه الاضلاع يتحمل العبء الطرف الاخر اذا كان الاب او الزوج
يتحمل مصاعب الغربة من وجوده وحيد بهدف العمل فقط في دائرة اجتماعية لا ينتمى لها
فالزوجة أيضا تتحمل عبء وجودها في دائره اجتماعية زائفة تصنفها زوجة ولكنها مع ايقاف التنفيذ .
تتحول في بعض الاحيان لوعاء لحمل اطفال الزوج في كل اجازه لتلدهم قبل ان ياتى للاجازة القادمة
اما عن الاطفال فيمثل له الاب الشكل المادى فقط أحلامهم المادية التى وحده يستطيع تحقيقها وطبعا مش هنغفل دور الاب اللى بينفذ كل الاحلام دى كرد علي غيابه الدائم
واللى بردو بيحصر وجوده في وجود مادى كل اللي حكيت عنه ده بيحول الزواج الى زواج مع ايقاف التنفيذ
مش هتكلم علي ابسط حقوق الست في الزواج ده لانها بتتنازل عن حقها في وجود زوجها زى ما هو بيتنازل عن ده بس عدم وجود علاقة جنسية منتظمة بين طرفي العلاقة من شأنها انها تنهي اى مشاعر
الضغط النفسي اللي بيبقي علي الطرفين بيبقي مريع عشان كده كل اللى هقدر اقوله في النهاية متسمحوش للغربة تسلب منكم عمركم ومتسمحوش للغربة انها تحولكم ألات لجمع الفلوس او ألات لتفريغ الاطفال.
لو هتسافر خد عيلتك معاك متسيبش ولادك لاحتياج وجودك ولا تخلي التواصل بينك وبين اهلك مربع رقمي بيتحكم فيه سرعة الانترنت.
