أنقذوا القاصرات .. من أهلهم أولا
الأهل هما السند والضهر عمر أهلك ما يضروكى
بيضربوكى خوف عليكى يا يا هبله
بياخدوا فلوسك ما ده حقهم ياما صرفوا عليكى
اخوكى بيتحرش بيكى ابوكى اغتصبك مرة ولا حاجة وامك عملت عبيطة
أحسن من الشارع
انقذوا القاصرات من مدعى الحريات
الحرية هي ثورة ضد الأهل والعادات والتقاليد كل ما كنتى حره في جسدك كل ما حققتى استقلالية اكتر لازم تستقلى بحياتك يا بنتى قاعدة مع اهلك كل ده ليه
العلاقات الجنسية اللى خارج اطار الجواز عمرها ما كانت حرام بالعكس منع نفسنا منها منتهى الجهل والحرمانية انتى حرة فاهمة ؟!!
الكلام اللى فوق ده سمعناه كلنا ، أعتقد الجزء الأول هو ثقافه اتربينا عليها كلنا ، طلعنا عارفين ان الأهل سند وضهر مينفعش نقول لا ولا نشوفهم غلط حتى .
الدين نهى اننا ننهر الوالدين الا في حاله الشرك بالله ده بالنسبه للدين الاسلامى .
بس كنت عايزه نفتكر سوا حاجه من فتره كده ، كان في هاشتاج انتشر اسمه #أول_مرة_اتعرضت_لتحرش_كان_عمرى وكان الهدف الاساسى منه اننا بنسلط الضوء على حالات التحرش اللى حصلت للاطفال .
بس الهشتاج كان مفاجأه صادمه للكل انا مش هقول انها كانت صادمه ليا لأن الموضوع بالنسبالى كان متوقع ، اغلب اللى دون على الهشتاج ده كانوا اتعرضوا للتحرش من اقارب ليهم من الدرجه الأولى والتانية ،اخوات واولاد عم واباء واعمام واخوال.
الصراحه كان موضوع صادم لدرجة انه اتقابل بسخرية من ناس كتير وتكذيب اكتر لناس كانت بتملك الشجاعة انها تحكي تجربة ليها أصل .
مش هتعتبر الأهل سند ، هو في سند متحرش ، طب هو حضرتك مفكرتش ان متحرش بتاع الشارع اللي بنشتم فيه ده طول الوقت ، اكيد مش أول تجارب ليه الشارع .
مهو احنا مش رقم اتنين عالميا فالتحرش بعد افغانستان من فراغ ، اكيد كان ليه السبق مع محيطه ، بس احنا للأسف لسه بندفن راسنا في الرمل.
في دراسات اتعملت عن الشرق الاوسط بتقول ان واحدة من بين 3 ستات بتتعرض للعنف الجنسي من ولادتها لحد الشيخوخة.
طب لسه شايفين ان الأهل سند وضهر .
أنا مش هدفن راسي في الرمل ، وهقول ان الأهل مبقوش سند وضهر.
احنا بننهار يا جماعه بننهار اخلاقيا واجتماعيا ونفسيا ، بننهار ومصرين ان المركب سليمة ومفيهاش حاجة .
خلينا ناخد مثال علي بنت اتولدت في أسرة أول حاجة اتعرضت ليها هو تشويه لأعضائها التناسلية عن طريق عملية الختان اللى لسه بتحصل عادى جدا .
وتكمل بانها لو كانت محظوظة ومتعرضتش لتحرش من احد الاهل او الاقارب او دايرة المعارف وبلغت.
قررت الاسرة انها تتاجر بيها من ضمن سبوبات اللي بتحللها مشايخ المزاج .
اه مشايخ المزاج
اللى بيشوفوا البنت مش اكتر من فرج وبس ، قطعة صغيرة خلقت لراحة الرجل وامتاعه .
تعالوا نفكر كده سوا ، تعرفوا كام واحدة اتعرضت لعنف أسرى " ضرب وتعذيب " من الأهل لمجرد ان في فجوة في التواصل بينهم.
الكلام اللي بنقراه وبننكره ده ونقول مش حقيقي ، جوانا عارفين كويس انه حقيقي وجدا كمان .
من قريب كنت علي جروب من بتوع الفيس بوك المفروض انه جروب دعم نفسي ، بنت كتبت بوست وقالت ان ابوها وامها واخوها دول الذنب اللي بتتعذب بيه .
لفت انتباهى التعليقات اللي كلها ضد البنت ، تعرفوا افتكرت يه ؟؟
افتكرت أيام الثورة ، لما كان في ناس بتقول ع مبارك اعتبروا ابوك ا اخى .
طب سؤال هو الاب ده اله ؟ ولا بنى ادم يخطئ ويصيب ؟
ليه بقي بنحط الأهل في مصاف الألهة ؟
أنا مش قاسية بس انا بفكر بصوت عالى حبتين .
يمكن ربنا مرزقش الكل بأهل زى أهلك اللى بتدافع عنهم باستماتة.
بس لما يقابلك حد اهله كانوا لعنة عليه ، امتنع عن الكلام أفضل .
بالمناسبه أنا أعرف بنات اتجوزت مخصوص عشان تهرب من جحيم أهاليهم.
بس تصور انهم اترموا في جحيم زوج بردو .
الحياة مش منصفة
الجمله دى اكتر حاجة مناسبة للي بنعيشه
طب بقول الكلام ده ليه ؟
من كام يوم انطلق هاشتاج تانى اسمه #انقذوا_القاصرات_من_مدعى_الحريات
لهلة فكرت وكأنى واحدة منهم ، في حالة انى بواجه عنف أسرى هروح فين وهلجأ لمين ؟ الشارع ؟؟
هل الشارع ارحم ؟
الصراحه لو بواجه عنف أسرى بشكل مبالغ فيه ، فأعتقد هتبقي اجابتى الشارع ارحم
بس لما هجرب الشارع هيبقي في استحالة ارجع البيت تانى
أنا هنا مش بقول للبنات اهربي بس بفكر زى ما قولنا بصوت عالى.
لان للاسف الهشتاج ده مش هيحقق الا وعي لشوية بنات تانى على اللي بيحصل برة وعلى اللي كلنا عارفين انه بيحصل من مدعى التحرر
اللى في الأغلب فكرة التحرر بالنسبالهم هي قماشة عظيمة للشق ، وتحويل بنات صغيرين لعاهرات.
واحيانا كمان بيوصل الموضوع للتربح من د.
بس كل اللي اقدر أقوله ان البنات هنا بين شقي الرحا.
بكل الحالات لأن لا أهل رحموهم ولا مجتمع .
مش قلتلكم الحياه مش منصفة ، طب ما تيجوا نرجع نوأد البنات ؟
افكار بره الصندوق اهي
معنديش نماذج ناجحة المرة دى اقولها
اصلا الكلام كله تشاؤمى
اقولكم كلمة واحدة
كونوا بنى أدمين مش ألهة
