تجميد العمل العام
حاولت افكر تاني في الوضع السئ اللي احنا عايشينه حاولت ألاقي مخرج ، نور ممكن نتسند عليه ،،، هداني تفكيري لحل اعتقد انه مش هروب ولا انسحاب ولا استسلام ولكنه حل تيكتكي لزوم المرحلة ده اللي ملهاش اي مخرج تقليدي من اللي كنا بنستخدمهم زمان
الحل من وجهة نظري هو " تجميد مؤقت للعمل العام "
لو بصينا حولنا كويس هتلاقوا ان الأحزاب بشكل او بآخر مجمدة واغلب شبابها وقيادتها النشطاء معتقلين علشان قالوا " تران وصنافير مصرية "
ولو بصيت علي منظمات المجتمع المدني المستقلة هتلاقيها مجمده ومتخفظ علي اموالهم وقياداتهم ممنوعين من السفر ومقيدين الإقامة ومتهمين في قضية " الفنكوش" المعروفة اعلاميا بقضية التمويل الإجنبي ١٧٣ لسنة ٢٠١١
روح بقي بص علي المواقع الإخبارية المستقلة اللي كانت الوحيدة اللي بتغطي بعض فعاليات الأحزاب وقضية المجتمع المدني وبتحاول توصل صوتهم في اقل الحدود م هتلاقي المواقع لانها اتحجبت .
الإعلام المرئ كله تم تأميمه لصالح النظام الحالي
تعالي بقي وتابع قضية خالد علي الهزلية العبثية اللي اتوجدت بس علشان خالد علي ميترشحش للرئاسة ،،، ويبقي عبره لاي حد فكر بشكل جدي يترشح مش بشكل كومبارس ديكوري .
طيب لو حد فكر ينزل انتخابات الرئاسية القادمة بجد وعدي من فخ الحبس والمنع من الترشح يعني هيحصل ايه ؟
١- هيقبضوا علي الشباب وهم بيلموا التوكيلات
٢- مفيش مواقع هتكتب عنهم هيبقي قدامك بس مواقع التواصل الإجتماعي الي حين اعتقد .
٣- مفيش منظمات مستقلة هتراقب بضمير ومهنية .
٤- مفيش إعلام مرئ هتعرف تطلع تتكلم فيه .
٥- اي مؤتمرات هتتلغي اي يفط هتتقطع .
وحاجات كتير ثانية ،،،، انتوا عارفينها كويس
وطبعا فنكوش مؤتمرات الشباب مش محتاج كلام عنه
يبقي بعد ده كله ايه لازمة اي حاجة انها تتعمل في مناخ مغلق بالضبه والمفتاح .
رأي نكمل ونكمل فقط في ملف المعتقلين لحد ما يخرجوا سالمين ويشوفوا حياتهم بعيد عن اي عمل عام
خلاص كده كده مفيش غير الصوت الواحد
وغير كده تشويه وخيانه وعمالة
فكروا تكتيكيا احنا بنخسر وبس بنخسر ايام وسنين شبابنا واولادنا المخلصين واحنا عجزه قدام حبسهم مش عارفين نعملهم حاجة ،،،
يمكن لو اخدنا موقف جماعي " ولازم جماعي " ان اننا نعمل كده لفترة ده ممكن يحمي عمر الشباب من السجن ، يمكن يدينا نفس ان احنا نعيد تفكيرنا وتنظمنا وخططنا لمراحل قادمة ممكن تكون افضل . واننا نتحرك بشكل يبقي فيه اي مكسب مش خساير وخساير وبس. يمكن ولكني اشك يشعر هذا النظام باي حرج مع اني متاكده اني محدش فيهم اصلا " بيحس او بيشعر " في العموم .
فكروا تاني معايا ممكن ابقي غلطانه وممكن ببقي في حلول افضل وممكن نلاقي ان ده حل مؤقت متاح وافضل .
