مع ان الصور حلوة .. فيها شئ بيوجعنا
مبقتش بحب ذكري يناير الحقيقة ولا بقيت بحب أشوف صور من بتاعة ال18يوم ،الصورة دي بقت بتوجعني مش بتفرحني خالص،ليه مفروض أفرح بالوجع وليه أحب أمل كذاب بقاله7 سنين بيطحني؟!
الصور شاهدة علي كذب ينايرعليا أنا مش من الناس اللي راحت تجيبها ولا سعت لها علي عكس معظم الينارجية هما اللي سعو لها، ويمكن توقعو غدرها وهروبها منهم ، يمكن دربو نفسهم علي الهزيمة يمكن كانو عارفين إن الثورات بتكره صحابها ومع ذلك خاطرو أنا لا ،وعمري ما إدعيت عكس ده ولا عمري حتي في وقت قوتها قولت إني سعيت لها ولا قلت كنت من اللي بيرتبولها ويمكن ده السبب اللي خلي صحابها خلوني معاهم .
هما حافظين بعض وكانو بيعرفو اللي جايلهم يكذب ويقولهم كنت معاكم من زمان واللي بيقولهم إنتو اللي ندهتو عليا وأنا ضميت علي هتافكم ،أنا ضميت علي الهتاف اللي كان بيهتف قبلها بكام يوم وأستنتها بعد ماوعدتني بالأمل وأتاريها تقصد الألم!
هي اللي جابتني ،خلفتني وهي كارهاني خدتني من طريقي لطريق تاني معرفش فيه حاجة وإتعلمت كل السكك بتاعتها ونسيت طريقي وبعد ماتوهتن عن طريقي سابتني في نص الطريق ومشيت ،قيدت إيدي ورجلي واخدت المفتاح معها ، لاخلتني عارفة أرجع لطريقي ولا راضية تسيبلي باب مفتوح اوصلها منه ، مخلتش طريق ممشتش فيه وأنا بدور يمكن ألقيها وبعد ماأتعب وأجري وأقول قربت تقفل الباب في وشي وتسيبني ،جابتني وأنا مليش مكان عندها أصلا عارفني وعارفة أنا جاية منين وشكلي إيه وعايزة إيه وفي الأخر بعد مافتحت جروح في كل مكان فيا بيتقالي إرجعي! إرجعي وانتي متكتفة وإنتي بتتحاسبي علي حاجات ملكيش يد فيها وكفاية إستفدتي الوعي والمعرفة !!
المعرفة والوعي في بلاد شبه بلادنا إستفادة؟ وحاجة مفروض أفرح بها؟! إني أعرف كل تفاصي بلادنا والفساد والخراب اللي فيها في كل المجالات وأعرف إن كل طرق الإصلاح مسدودة مرفوضة وكمان بتتعاقب علي المحاولة دي إستفادة؟! الخيبة والكسرة بعد الأمل والرجاء والكوابيس بعد الأحلام إستفادة؟أخدت روحي معها وربطتني بها وهفضل أدورعليها وأستنها تداوي الجروح اللي فتحتها بس من هنا لساعتها فأنا مهزومة وشايفة نفسي مسئولة عن زيادة الناس اللي مش لاقية تتعالج وعن قطع رزق الشباب اللي كانو بيشتغلو في السياحة وعن إرتفاع الأسعار وعن سجن وضياع أعمار شباب أهلهم أولي بهم من السجون وعن غربة حتت مني هربانة من الموت والسجون.
يمكن مكنتش صادقة ولا مخلصة ؟ بس متأخرتش في حاجة لاوقت ولا مجهود!وحتي أما كانت إختيار مع حاجات حبيتها وإتخيرت بينها وبن يناير ،إخترت يناير! بس هي اللي مختارتنيش ،هفضل كل ماأشوف صورة منها أفتكر جملة فيروز"مع إن الصور حلو فيها شي بيوجعنا"
