أفكار برة الصندوق .. تيران وصنافير مصرية
وسط دوشة السوشيال ميديا الفترة اللي فاتت ، توقفت عند بيانات عديدة ومختلفة ولينكات كتير للتوقيع لرفض مناقشة اتفاقية تيران وصنافير في البرلمان ،،، حسيت ان الخطر قرب والناس بدات تشعر بالخطر ده وان ممكن يكون اخر فصل في مسلسل التنازل عن الجزر في البرلمان ده بعد ايام .
بره الصندوق
غوصت اكتر وسط دوشة السوشيال ميديا حاولت ا #فكر_تاني واخرج بره الصندوق واقول لنفسي ان موضوع البيانات ده والتوقيعات مش كفاية ،،، لابد من مواجهة مباشرة بين النواب واهل الدايرة ،،، لابد من بيانات تصدر من النواب يعلنوا بيها رسميا موقفهم من مناقشة الاتفاقية بعد قرار نهائي وبات صدر من القضاء بمصرية الجزر ،،،،
المواجهة المباشرة
المواجهة المباشرة اللي اتوصلتلها هي رسائل علي موبايل النواب من الاهالي ،،، كل مواطن يبعت لنواب دائرة رسالة ويصورها وينشرا علي صفحات التواصل الاجتماعي كنوع من الضغط عليهم وفي نفس الوقت تشجيع كل الاس انها تعمل زيهم وتبعت رسايل تطلب موقف معلن وواضح من نواب دايرتهم .
نص الرسالة
كتبت نص رسالة جيه في دماغي وقلت للناس تبعت بالمعني ده او بالشكل المناسب لهم ، وكان نصها " نرجو اصدار بيان رسمي للرأي العام عن موقف حضرتك من مناقشة اتفاقية اعادة ترسيم الحدود ونعلن اننا لن نفرط في الارض ومناقشة اتفاقية ترسيم الحدود بعد احكام القضاء النهائية باطل وان بيع الارض والتفريط في الجزر خيانه عظمي يعاقب عليها القانون والدستور ولن نتنازل عن محاسبة الخائن ابدا بما نص عليه الدستور والقانون مهما طال الزمن ،،، السلطة زائلة والرئيس زال والاجهزة الامنية زائلة الباقي الي الابد الوطن ارضا وشعبا فلا تعملوا حساب الا لضمائركم وتراب هذا الوطن "
افكار اخري خارج الصندوق
وببحث اكتر علي السوشيال ميديا لقيت مش انا لوحدي اللي قررت ا #فكر_تاني خارج الصندوق ، لقيت هالة مصطفي زملتنا قررت تبعت تلغرافات للنواب وتدعي الناس تعمل زيها ونشرت كمان صور التلغرفات ،، مش بس كده وفاء الشري ناشطة جدعة من اسوان قررت كمان تبعت لهم انذرات علي يد محضر مضمونها يرفضوا مناقشة الاتفاقية ،،،، وعلي اخر اليوم الاستاذ نور فرحات دعي الناس تعلق صورة خريطة مصر بتيران وصنافير علي العربيات وشرفات المنازل ،،، ودعي خالد علي لحملة الكترونية يوم السبت بنشر الخريطة كاملة بالجزر وتوحيد هاشتاجات تؤكد تمسكنا بالجزر والقرار النهائي الصادر من المحكمة بمصرية جزر تيران وصنافير
استجابة المواطنين
حصلت استجابة كويسة جدا في الساعات الاولي من نشر الرسالة في بوست علي الفيس بوك والناس بدات تبعت وتدور علي ارقام النواب ونشر وتبعت صور الرسايل اللي بعتتهم مش بس كده بعض النواب من نفسهم قرروا ينشروا بيان رسمي ويعلنوا مواقفهم للرأي العام . وده شئ ايجابي جدا حتي لو كان تأثيره في علم الغيب وحتي لو الواضح ان نسبة للنواب اللي هيسيطر عليها النظام اكبر ولكن كان لازم نحاول ونعمل اللي علينا .
الدرس المستفاد
طول الوقت محتاجين ن #فكر_تاني ونخرج بره الافكار التقليدية ونحاول نلاقي افكار جاذبة للناس جديدة مستحدثة ضاغطة مينفعش نستسلم مهما كان العدو اقوي واكبر ،،، فكروا تاني طول الوقت اكيد عقلنا هيطلع حاجات جديدة مبتكره فعالة
