فكري تاني .. فكري بشجاعة
فكرتي قبل كده تحكي من غي خوف ,,طب فكرتي قبل كده تاخدي حقك من اللي بيضايقك او بيتحرش بيكي فكرتي تواجهي وماتهربيش بالسكوت والصمت ,, انا حبيت بس اشاركم حكايه صديقه ليا بس نهايتها للاسف صعبه وكان لازم تعرفوها عشان تتعلموا منها اللي بيسكت نهاية اسوأ من الموت!
قررت ساره انها تسافر وتغير جو مع اصحابها كانت مبسوطه اوي وسعيده بالبحر والسما والهوا وهو بيحرك شعرها وبيخلي خدودها تضحك لوحدها وكل يوم تروح مكان شكل وترجع مبسوطه اكتر وتقول ياريت الوقت يقف من كتر السعاده اللي هي حاسه بيها بس للاسف الدنيا ماكنتش عادله للاخر معاها كانت نازله تشتري اكل وهي راجعه خطفها حيوان و هاكون ظلمت الحيوان لو شبهته بيه لانه للاسف اغتصبها وبهدلها هي خافت ومقدرتش تطلع صوت وسكتت وماتكلمتش ولا حكت لحد عشان برده كانت خايفه عشان الناس ماتحكمش عليها او حد يوصل لابوها فيقتلها وهي مظلومه, علي فكره ساره بتقولي انا مش خايفه من الموت بس كان نفسي اخد حقي نفسي اهلي يوقفوا معايا نفسي حد يقولي اعمل ايه نفسي بس احس اني مش لوحدي
حاولت اقنعها كتير بانها تروح تعمل محضر بسرعه ردت لا والنبي انا خايفه وبعدين الموضوع عدا عليه كتير خلاص ,اقنعت ساره بمحاولات كتير بانها لازم تكشف علي الاقل عشان تتطمن علي نفسها بدل ما يكون نقلها مرض او حاجه او اي عدوه بس للاسف كان الوقت اتاخر عشان هو فعلا نقلها فيروس اسمه HPV وده باختصار فيروس بيسبب سرطان عنق الرحم وعلاجه مش مضمون وممكن جدا يكون مش موجود في مصر ونسبه الاصابه عاليا جدا ومنتشره علي فكره هو ليه تطعيم زي التطعيم اللي كنا بناخده واحنا صغيرين طبعا مش موجود في كل الدول للاسف .
نرجع لموضوعنا الاهم واللي هو ساره ,, ساره تقريبا حياتها انتهت بسسب انها سكتت وخافت وماقدرتش تتكلم عن اللي حصلها مع ان اللي حصل معاها ده كان جريمة بس بسبب البوعبوع اللي احنا عايشين فيه واللي ربا جوانا رعب من كلام الناس وعقابهم لينا لي اي حاجه ممكن نعملها لمجرد انك بنت ساره تقريبا خسرت حياتها , قصه قاسيه نا عارفه بس واقعيه وبتحصل كتير بس ماحدش بيتكلم .
علي فكره انا مش بحكيها علشان تحبطوا او تتدايقوا ,,انا بحكيها علشان مايتكررش مع حد اوعي تخافي واوعي تستسلمي خدي حقك من اي حد وباي تمن ولاي موقف مهما كان بسيط , ماتسكتيش علشان ماحدش هايجبلك حقك غيرك انتي , انتي مش لوحدك كلنا معاك , وكفايا اوي ان الحق يكون معاكي .
