الافطار العلني جريمة
انتشر قبل دخول رمضان كوميك ساخر يعبر عن شخص مسيحي بيقول "ايوه انا المسيحي الي مستني رمضان يجي" وبيرد عليه شخص آخر برضه بسخرية وتعجب انه ليه مستني رمضان هو انت هتصوم معانا يا @€#%¥ (شتائم مختلفة..) وفي كوميكس أخرى كانت عادية ولطيفة تظهر الوحدة الوطنية والترابط بيينا كمصريين وكل الشعارات النمطية الي كلنا عارفينها.
انا مسيحية، ولحد النهاردة صومت معظم أيام رمضان.. مش عشان الوحدة الوطنية، ومش عشان اشارك صحابي الي هقابلهم علي الفطار ناكل سوا ولا عشان اشارك الناس معاناتهم.. لا، عشان انا مضطرة.. معنديش اختيار تاني.. أو عندي بس هيكون الاختيار الأصعب الي غالباً هيعرضني لاستغفارات ونفخ في ودني ألف مره في اليوم.. وعرضني لـ التف عليا كمان في أحد السنين السابقة في رمضان اما قررت اشرب في الشارع عشان كنت بعاني من مشاكل صحية صعبة
انا بنزل شغلي الصبح بدري، معظم الوقت بخلص شغلي بعد الإفطار بساعات كتيره.. خلال الفترة دي كلها أنا مش بقدر اكل او اشرب مراعاة لمشاعر الناس اولاً، وثانياً عشان حتي لو أنا قررت اني مش مضطره اراعي مشاعر حد وانه الي صائم دا كبير وناضج ومش هيتعب لمجرد انه شافني بشرب فا عن تجربة شخصية عرفت انه مفيش حد ناضج في مصر غير قلة قليلة ولو قررت اشرب أو أكل هتكون النتيجة بائسه ونظرات حارقة.. فا بضطر اصمد وأكم صيام ميخصنيش
بيجي وقت الفطار وانا الوحيدة الي مطلوب مني اكمل شغل عشان انا مش مسلمه فا اكيد مش صايمة فا الصائمين هما أولي انهم ياكلوا الأول طبعاً.. وساعتها اكيد مش هفضل أشرح اني عطشانة وجعانة زيي زيكوا.. هيكون نقاش وحوار مش منطقي و بائس أوي.
بعيداً عن شهر رمضان، في أيام كتير في الشغل خلال كل شهور السنة بننسا انا وزملائي في العمل ناكل او نشرب او ندخل الحمام حتي من كتر ضغط الشغل وبنتحمل وبنكمل يومنا عادي بدون ما نتعصب علي العملاء بحجه اننا صايمين وبدون ما نتكاسل في شغلنا بحج اننا صايمين وبدون ما نأجل اي حاجة بحجة اننا صايمين
الصيام أكيد عب، خصوصاً في طقس ودرجات حرارة مصر الحارة وفي موصلات وشوارع مصر الزحمة.. بس احنا أشخاص كبار مسؤولين عن أفعالنا وقرار الصيام الي بتقوم به نظراً لأنك شخص مؤمن وتتبع فروض دينك.. دا قرارك أنت.. لوحدك.. مش مضطره أدفع تمن قرارك معاك، او اشاركك حتي فيه.. مش عشان انا شخص بارد لا يراعي مشاعر الآخرين، بس عشان دا قرارك أنت، مش أنا، أنت الي بتقوم بهذا الفعل عشان تكسب حسنات ورصيد حسن في دينك.
ولا عشان انا عنصرية متعصبة.. لأنه حتي لو انا مسلمة وقررت اني مش هصوم رمضان فمازالت هعاني من نفس الاضطهاد والمضايقات.. الأزمة في انه ازاي شخص تاني يتجرأ ويقوم بفعل غير الي انت بتقوم به، فا لازم نعاقبه اياً كانت ديانته. بل بالعكس يمكن لو انت غير مسلم فممكن الحجه دي تشفعلك مع شخص غير متطرف لكن لو أي حد اكتشف أنك مسلم ومش صايم هتكون كارثة أكبر.
في النهاية أريد أن أذكر أنه بلاد التسامح والتدين العربية الجميلة من بينهم دول زيي المغرب، السعودية، الكويت، العراق والبحرين، وغيرهم.. بيعتبروا عدم الصيام جريمة يعاقب عليها القانون.
