ရှမ်းပြည်နယ် တောင်ပိုင်းဖယ်ခုံနှင့် ညောင်ရွှေနယ်စပ်၌ ဖြစ်ပွားခဲ့သည့်တိုက်ပွဲတွင် အထိနာခဲ့သည့် စစ်ကောင်စီတပ်သည် တိုက်ပွဲဖြစ်ပွားရာအနီးရှိ ဖယ်ခုံမြို့နယ် ဆောင်နန်းခဲရွာကို ယနေ့ ညနေပိုင်း၌ ဝင်ရောက်မီးရှို့ဖျက်ဆီးခဲ့သည်ဟု ဖယ်ခုံပြည်သူ့ကာကွယ်ရေးတပ် (PDF)က သတင်းထုတ်ပြန်သည်။
ယနေ့(မေလ ၁၆ရက်)ညနေ ၅နာရီခန့်တွင် တိုက်ပွဲဖြစ် ပွားမှုမရှိဘဲ စစ်ကောင်စီတပ်သည် ဆောင်နန်းခဲရွာကို မီးရှို့ဖျက်ဆီးခဲ့သည်ဟု ဖော်ပြထားသည်။
ဆောင်နန်းခဲရွာအနီးတောင်ကြော၌ မေလ ၁၅ရက်က ဖြစ်ပွားသည့် ဒေသတွင်းကာကွယ်ရေးပူးပေါင်းတပ်များနှင့် စစ်ကောင်စီတပ်အကြား တိုက်ပွဲတွင် စစ်ကောင်စီတပ်က သေဆုံးမှုများရှိခဲ့သည်ဟု ဆိုသည်။
ယနေ့တွင် မိုးဗြဲရေကာတာ အရှေ့ဘက်တာဘောင်အနီး၌ ထိတွေ့တိုက်ပွဲ တစ်ကြိမ်ဖြစ်ပွားခဲ့သည်ဟုလည်း ဖော်ပြထားသည်။
တိုက်ပွဲတွင် ပြည်သူ့ကာကွယ်ရေးတပ်များဘက်က ထိခိုက်မှု့မရှိကြောင်း၊ စစ်ကောင်စီတပ်ဘက်က ထိခိုက်မှုကိုလည်း အတည်ပြုချက်မရကြောင်း ဖယ်ခုံ PDFက ထုတ်ပြန်သည်။
အဆိုပါဒေသရှိ ထီရိရွာ စစ်ကောင်စီကင်းစခန်း တိုက်ခိုက်ခံရပြီးနောက် မေလ ၁၃ရက်မှစ၍ စစ်ကောင်စီတပ်က စစ်ကြောင်းထိုးလာရာ မေလ ၁၄ရက်တွင် ဒေသတွင်း ကာကွယ်ရေးတပ်များက မိုင်းဆွဲတိုက်ခိုက်ခဲ့ပြီး မေလ ၁၅ရက်တွင် ဆောင်နန်းခဲရွာအနီး၌ တိုက်ပွဲဖြစ်ခဲ့သည်။ အဆိုပါ တိုက်ပွဲများ၌ စစ်ကောင်စီတပ်မှ ဗိုလ်မှူးတစ်ဦးအပါအဝင် ၈ဦးထက်မနည်းသေဆုံးပြီး ကာကွယ် ရေးပူးပေါင်းတပ်မှ တစ်ဦးကျဆုံးကာ ဒဏ်ရာရသူ အချို့ရှိခဲ့သည်ဟု တိုက်ပွဲတွင် ပါဝင်နေသည့် ရှမ်းတောင်အခြေစိုက်လူငယ်များဖြင့်စုဖွဲ့ထားသည့် တပ်ရင်း (၁၀၀၈)က သတင်းထုတ်ပြန်ထားသည်။
