စစ်​ကောင်စီက တရုတ်ဝန်ကြီးမလာခင် တရုတ်​စွမ်းအင်ကုမ္ပဏီနှင့်အိန္ဒိယဘဏ်များ၏​ငွေစာရင်းများကိုကျပ်​ငွေအတင်းအကြပ်​ပြောင်းခိုင်းခြင်းမှကင်းလွတ်ခွင့်ပြုဟုဆို

စစ်​ကောင်စီကတရုတ်နိုင်ငံခြားရေးဝန်ကြီး ခရီးစဉ်မတိုင်ခင် တရုတ်ရေနံကုမ္ပဏီနှင့် အိန္ဒိယဘဏ်များ၏ နိုင်ငံခြားငွေစာရင်းများသို့ ကျပ်ငွေအတင်းအကျပ်ပြောင်းလဲ​စေခြင်းမှ ကင်းလွတ်ပြုကြောင်း စစ်ကောင်စီတပ်ကထုတ်ပြန်သည်။

စစ်ကောင်စီကကင်းလွတ်ခွင့်ပြုသည့် ကုမ္ပဏီများတွင် တရုတ်အမျိုးသားရေနံ ကော်ပရေးရှင်း(CNUOC)၊ အိန္ဒိယ ပို့ကုန်သွင်းကုန်ဘဏ်၊ အိန္ဒိယ Panjab National ဘဏ်တို့ပါဝင်သည်ဟု စစ်ကောင်စီ၏ ဗဟိုဘဏ်က ဇွန် ၂၉ ရက်စွဲဖြင့်ထုတ်ပြန်ခဲ့ခြင်းဖြစ်သည်။

ထိုပြင် ကိုရီးယားဘဏ် Woori ဘဏ်၏ ရန်ကုန်ရုံးခွဲကမြန်မာ့နိုင်ငံခြားကုန်သွယ်မှုဘဏ်တွင် ဖွင့်လှစ်ထားသည့် နိုင်ငံခြားငွေစာရင်းကိုလည်း ကင်းလွတ်ခွင့်ပြုသည်ဟု စစ်ကောင်စီကဆိုသည်။

ပြည်တွင်းရှိကုမ္ပဏီများ၊ စီးပွားရေးလုပ်ငန်းများနှင့် အဖွဲ့အစည်းများ၏ ပြည်တွင်းဘဏ်များရှိ နိုင်ငံခြားငွေစာရင်းများကို စစ်​ကောင်က ၎င်းသတ်မှတ်ထား​သော ၁ ​ဒေါ်လာလျှင် ၁၈၅၀ကျပ်နှုန်းဖြင့် ၂၄ နာရီအတွင်းကျပ်ငွေသို့မဖြစ်မ​နေပြောင်းလဲရမည်ဟု စစ်ကောင်စီက ၂၀၂၂ ဧပြီ ၃ ရက်ညက ထုတ်ပြန်ခဲ့သည်။ မလိုက်နာပါက​​ထောင်တစ်နှစ်ချနိုင်​သောပုဒ်မဖြင့်အ​ရေးယူမည်ဟုခြိမ်း​​ခြောက်ထားသည်။

နိုင်ငံခြား​ငွေကို ၂၄ နာရီအတွင်းကျပ်​ငွေမဖြစ်မ​နေ ​ပြောင်းရမည်ဆို​ခြင်းမှ ကင်းလွတ်ခွင့်ကို တရုတ်ရေနံကုမ္ပဏီနှင့် အိန္ဒိယဘဏ်လုပ်ငန်းများကို စစ်ကောင်စီက တရုတ်နိုင်ငံခြား​ရေးဝန်ကြီး ဝမ်ယိခရီးစဥ်မတိုင်ခင် ၂ ရက်အလိုတွင်ကင်းလွတ်ခွင့်ပြုလိုက်ခြင်းဖြစ်သည်။

“ဒီနိုင်ငံတွေက ဖိအားပေးလို့ စစ်တပ်ကသူတို့ကိုကင်းလွတ်ခွင့်ပေးတာ။ အခုက ဘယ်စံနှုန်းနဲ့ ကင်းလွတ်ပေးတယ်ဆိုတာ မရှိတော့ဘူး။ သူတို့နဲ့ အဆင်ပြေတဲ့ ကုမ္ပဏီဆိုရင် ကင်းလွတ်ခွင့်ပေးတဲ့ စနစ်ဖြစ်နေပြီ။ တကယ့်ကို ဗရမ်းဗတာ စီမံခန့်ခွဲမှုပါ”ဟု ရန်ကုန်အခြေစိုက် ပို့ကုန်လုပ်ငန်းရှင်တစ်ဦးကပြောသည်။

ထိုပြင် အထူးစီးပွားရေးဇုန်များဖြစ်သည့်သီလဝါ၊ ထားဝယ်နှင့်ကျောက်ဖြူ အထူးစီးပွားရေးဇုန်များရှိကုမ္ပဏီများ၏ နိုင်ငံခြားငွေစာရင်းများကိုလည်း ကျပ်ငွေအဖြစ်ပြောင်းလဲ ရန်မလိုအပ်ကြောင်းလည်းစစ်ကောင်စီကထုတ်ပြန်ထားသည်။