ခရိုအေးရှား နိုင်ငံမှာ ဝတ်ပြု ခရီးစဉ်အဖြစ် ပြေးဆွဲတဲ့ ဘတ်စ်ကားတစ်စီး လမ်းဘေးက လျှိုထဲ ပြုတ်ကျခဲ့ရာက လူ ၁၂ ဦးထက်မနည်း သေဆုံးခဲ့ကြောင်း သိရပါတယ်။
ဘတ်စ်ကားပေါ်မှာ လိုက်ပါလာသူတွေက ပိုလန် ဘုရားဖူး ခရီးသည်တွေ ဖြစ်ကြပြီး ဘော့စ်နီးယား နိုင်ငံမှာရှိတဲ့ မက်ဂျူဂေါ်ဂျီ ကက်သလစ် ခရစ်ယာန် ဘုရားကျောင်းဆီ ဦးတည်နေခဲ့တာလို့ ဆိုပါတယ်။ ဩဂုတ် ၆ ရက်မှာ ဆိုးရွားတဲ့ ယာဉ်မတော်တဆမှု ကြုံခဲ့တဲ့နောက် ၁၂ ဦးသေဆုံးပြီး အသက်ရှင်သူ ၃၂ ဦးစလုံးလည်း ဒဏ်ရာတွေ ရခဲ့ကြောင်း၊ အဲဒီထဲက ၁၉ ဦးဟာ အခြေအနေ စိုးရိမ်ရကြောင်း ခရိုအေးရှား ရဲတပ်ဖွဲ့က ထုတ်ပြန်ပါတယ်။
စိန့်ဂျိုးဆက် ညီအစ်ကိုတော်များ ကက်သလစ် အဖွဲ့က စီစဉ်ပေးခဲ့တဲ့ ဝတ်ပြုခရီးမှာ ခရစ်ယာန် ဘုန်းတော်ကြီး ၃ ပါးနဲ့ သီလရှင် ၆ ပါးလည်း လိုက်ပါခဲ့ကြပါတယ်။ ပိုလန် နိုင်ငံခြားရေး ဝန်ကြီးဌာနက ဘတ်စ်ကားပေါ် ပါသွားသူ အားလုံးဟာ အရွယ်ရောက်ပြီးသူ ပိုလန်နိုင်ငံသားတွေချည်းပဲ ဖြစ်တယ်လို့ အတည်ပြုခဲ့ပါတယ်။
ပိုလန် ဘုရားဖူး အဖွဲ့ဟာ ဝါဆောမြို့တော်နားက ရာဒွမ်နဲ့ ဆိုကိုလိုမြို့တွေမှာ နေထိုင်သူတွေလို့ သိရပါတယ်။ ဘတ်စ်ကားဟာ ခရိုအေးရှားရဲ့ မြို့တော် ဇာဂရက်ဘ် အရှေ့မြောက်ပိုင်းက ဂျာရက်ခ် ဘီဆက်ကီနဲ့ ပေါ့ဒ်ဗိုရက်ဗ် မြို့တွေကြားက အဝေးပြေး လမ်းပိုင်းမှာ လမ်းဘေး လျှိုထဲ ထိုးကျသွားခဲ့တာ ဖြစ်ပါတယ်။
ပိုလန် တရားရေး ဝန်ကြီးဌာနနဲ့ ရှေ့နေချုပ်ရုံးတို့က ဒီယာဉ်မတော်တဆမှုနဲ့ ပတ်သက်လို့ စုံစမ်း စစ်ဆေးမှုတွေ ပြုလုပ်သွားမယ်လို့ ကြေညာပါတယ်။ ပိုလန် အစိုးရ အဖွဲ့ဝင် ဝန်ကြီးနှစ်ဦးဟာလည်း ဖြစ်စဉ်နဲ့ ပတ်သက်ပြီး အသေးစိတ် စုံစမ်းဖော်ထုတ်မှုတွေမှာ ကူညီဖို့အတွက် ခရိုအေးရှားကို ထွက်ခွာခဲ့ကြပါတယ်။
သေဆုံးသူတွေထဲမှာ ယာဉ်မောင်းဖြစ်သူတော့ မပါဝင်ဘူးလို့ ကနဦး သတင်းရထားပေမယ့် အတိအကျ အတည်မပြုနိုင်သေးကြောင်း ပိုလန် နိုင်ငံခြားရေး ဝန်ကြီးဌာနက ထုတ်ပြန်ပါတယ်။ ခရိုအေးရှား ဝန်ကြီးချုပ် အန်းဒရက်ဂျ် ပလန်ကိုဗစ်က သေဆုံးသူတွေရဲ့ မိသားစုတွေနဲ့ထပ်တူ ကြေကွဲ ဝမ်းနည်းကြောင်း ထုတ်ပြန်ခဲ့ပါတယ်။
ခရိုအေးရှားက မြို့ငယ်လေး တစ်ခုဖြစ်တဲ့ မက်ဂျူဂေါ်ဂျီက ဘုရားကျောင်းဟာ ၁၉၈၀ ပြည့်လွန်နှစ်တွေအတွင်း မယ်တော် မာရီကိုယ်တိုင် ကိုယ်ထင်ပြ လာရောက်ဖူးကြောင်း ဒေသခံ ကလေးငယ်တွေရဲ့ ပြောဆိုမှုအရ ကက်သလစ် ခရစ်ယာန် ဘာသာဝင်တွေကြားမှာ အထူး ထင်ရှားကြောင်းလည်း သိရပါတယ်။
