စစ်ကိုင်းတိုင်း အရာတော်မြို့နယ်ရှိ ကျေးရွာသုံးရွာကို စစ်ကောင်စီတပ် ခြေလျင်စစ်ကြောင်းနှစ်ကြောင်းဖြင့် တစ်ပြိုက်နက်အကြမ်းဖက်ဝင်ရောင်နေ၍ ဒေသခံများ ထွက်ပြေးတိမ်းရှောင်နေရကြောင်း ပြည်သူ့ကာကွယ်ရေးအဖွဲ့များက ထုတ်ပြန်သည်။
အရာတော်မြို့နယ်ရှိ ခင်သာ၊ရှောက်ခါးရွာ နှင့် ကောင်းသစ်ကျေးရွာကို ယနေ့( ဩဂုတ်၇ရက်) နေ့လည် ၁နာရီခန့်မှစတင်ကာ စစ်ကောင်စီစစ်ကြောင်းနှစ်ကြောင်းဖြင့် တပြိုင်နက်ဝင်ရောက်နေခြင်းဖြစ်သည်။
ယမန်နေ့(သြဂုတ် ၆ရက်)ကလည်း အရာတော်မြို့နယ် ဘောင်းကျရွာကို စစ်ကြောင်းထိုးခဲ့သည့် အင်အား ၁၀၀ခန့်ပါ စစ်ကောင်စီတပ်ဖွဲ့သည် ခင်သာနှင့် ရှောက်ခါး ကျေးရွာသို့ ဝင်ရောက်နေပြီး တချိန်တည်းတွင် ဟင်္သာရွာမှ စစ်ကောင်စီတပ်ဖွဲ့များက ကောင်းသစ်ကျေးရွာသို့ စစ်ကြောင်းထိုး ဝင်ရောက်လျက်ရှိကြောင်း အရာတော်ပို့စ်က ထုတ်ပြန်ထားသည်။
အရာတော်ပို့စ်သည် ဒေသတွင်း ပြည်သူ့တော်လှန်ရေးတပ်ဖွဲ့များ၏ သတင်းထုတ်ပြန်ရေးဌာန ဖြစ်သည်။
” စစ်ကိုင်းတိုင်းထဲက မြို့နယ်တော်တော်များများကို စစ်ကောင်စီက တစ်ပြိုင်နက် တိုက်ခိုက်နေတဲ့ သဘောရှိတယ်။ ဒီရက်ထဲတင် အရာတော်၊ မင်းကင်း၊ ဒီပဲယင်းနယ်တွေကို လေကြောင်းရော မြေပြင်ကပါ ထိုးစစ်ဆင်နေတယ်”ဟု ဒီပဲယင်းမြို့အခြေစိုက် ဂဠုန်ပြည်သူ့ကာကွယ်ရေးတပ်ဖွဲ့မှ တာဝန်ရှိသူတစ်ဦးက ပြောသည်။
စစ်ကောင်စီက အကြမ်းဖက်တိုက်ခိုက်နေ၍ အရပ်သားပြည်သူများ နေရပ်စွန့်ခွာ ထွက်ပြေးနေရသလို စစ်ကောင်စီတပ်လည်း အထိနာနေသည်။
အရာတော်မြို့နယ် မင်းရွာကြီးအနီးတွင် သြဂုတ် ၄ရက်မှ သြဂုတ် ၆ရက်အထိ ဖြစ်ပွားခဲ့သည့် တိုက်ပွဲတွင် စစ်ကောင်စီဘက်က ၂၀ ဦးထိ သေဆုံးခဲ့သည်ဟုBurmese Revolutionary Technical Front- BRTFက သတင်းထုတ်ပြန်ထားသည်။
မင်းရွာကြီးအနီးတိုက်ပွဲတွင် ပြည်သူ့ကာကွယ် ရေးရဲဘော်တစ်ဦး ကျဆုံးခဲ့ပြီး ၆ ဦး ဒဏ်ရာရခဲ့သည်။
