နယ်စပ်အနီးစစ်ကောင်စီလေတပ်ရဲ့ ဗုံးကြဲ တိုက်ခိုက်မှုဟာ စိုးရိမ်စရာဖြစ်ပြီး မြန်မာဘက်ကိုအသိပေး ပြောကြားထားတယ်လို့ အိန္ဒိယ နိုင်ငံခြားရေးဌာနကပြောလာပါတယ်။
ဒါပေမယ့် စစ်ကောင်စီရဲ့ တိုက်လေယာဉ်တွေဟာ အိန္ဒိယ လေပိုင်နက်ထဲကို ကျုးကျော်ဝင်ရောက်တာမရှိဘူးလို့ The Economic Times သတင်းဌာနကို အိန္ဒိယနိုင်ငံခြားရေးဌာနအတွင်းဝန်က ဇန်နဝါရီလ ၁၉ ရက်က ပြောပါတယ်။
စစ်ကောင်စီဟာ ဇန်နဝါရီလ ၁၀ ရက်နဲ့ ၁၁ ရက်တွေမှာ အိန္ဒိယ − မြန်မာ နယ်စပ်အနီး မြန်မာဘက်ခြမ်းမှာရှိတဲ့ ချင်းအမျိုးသားတပ်ဦး (CNF)ရဲ့ ဌာနချုပ်ကို ၂ ရက်ဆက်တိုက်ဗုံးကြဲခဲ့တာပါ။
ဗုံးကြဲတိုက်ခိုက်မှုကြောင့် CNF တပ်ဖွဲ့ဝင်အချို့ ထိခိုက်သေကြေမှုတွေရှိသလို အိန္ဒိယ ဘက်ခြမ်းလည်း ဗုံးကျရောက်ပြီး စစ်ကောင်စီဂျက်တိုက်လေယာဉ်တွေဟာ အိန္ဒိယ လေပိုင်နက်ကိုကျုးကျော်အသုံးပြုခဲ့တယ်လို့ မြေပြင်အချက်အလက်တွေကို ကိုးကားပြီး Chinland Information Center က ပြီးခဲ့တဲ့ ရက်ပိုင်းက ထုတ်ပြန်ပါတယ်။
အိန္ဒိယ နိုင်ငံခြားရေးဌာနဘက်က စစ်ကောင်စီတိုက်လေယာဉ်တွေဟာ သူတို့ လေပိုင်နက်ကို ကျုးကျော်တာမရှိသလို ဗုံးဟာလည်း ၂ နိုင်ငံ နယ်ခြားမြစ် တယော (Tiau) မြစ်ထဲ ကျရောက်တာလို့ အိန္ဒိယနိုင်ငံခြားရေးအတွင်းဝန်က ပြောပါတယ်။
ဒါပေမယ့် ဒီဗုံးကြဲ တိုက်ခိုက်မှုကို အိန္ဒိယအစိုးရအနေနဲ့ စိုးရိမ်ပြီး မြန်မာဘက်ကို အသိပေး ထားတယ်လို့ ဆိုပါတယ်။
