စစ်ကောင်စီ၏ တရားမဝင် ရွေးကောက်ပွဲကို လုံး၀ အသိအမှတ်မပြုကြောင်းကြားကာလ ခူမီး(ချင်း)မျိုးနွယ်စုများရေးရာပေါင်းစပ်ညှိနှိုင်းရေးကောင်စီ (IKACC)က ယမန်နေ့တွင် ထုတ်ပြန်ခဲ့ပြီး ချင်းပြည်နယ် ပလက်၀မြို့နယ်အတွင်း၌ စစ်ကောင်စီ၏ တရားမဝင်ရွေးကောက်ပွဲအတွက် ပူးပေါင်းဆောင်ရွက်သူများကို အရေးယူမည်ဟု သတိပေးလိုက်သည်။
၂၀၂၃အတွင်း ရွေးကောက်ပွဲ ကျင်းပနိုင်ရန် စစ်ကောင်စီက ပြင်ဆင်လျက်ရှိရာ ပလက်ဝမြို့နယ်အတွင်း၌လည်း ကြိုတင်ပြင်ဆင်မှုလုပ်ငန်းများ စတင်နေကြောင်း ဖော်ပြထားသည်။
အာဏာသိမ်းစစ်ကောင်စီက ကျင်းပပြုလုပ်ရန်စီစဥ်ဆောင်ရွက်နေသော ရွေးကောက်ပွဲသည် လက်ရှိမြန်မာနိုင်ငံ၏ နိုင်ငံရေးဖြစ်ပျက်မှုများအတွက် ကောင်းမွန်သည့်အဖြေကို ရရှိစေနိုင်မည်မဟုတ်ကြောင်း သုံးသပ်သည်ဟု IKACCက ထုတ်ပြန်သည်။
ထို့ပြင် ရွေးကောက်ပွဲတစ်ရပ်တွင် အခြေခံအားဖြင့် ရှိသင့်ရှိထိုက်သော လွတ်လပ်မှု၊ တရားမျှတမှုနှင့် လူ့အခွင့်အရေးများ ပြည့်ပြည့်ဝဝကျင့်သုံးရရှိနိုင်မည် မဟုတ်ကြောင်း ဖော်ပြထားပြီး တရားမဝင် ရွေးကောက်ပွဲကို လုံးဝအသိအမှတ် ပြုလက်ခံမည်မဟုတ်ဟု အသိပေးထားသည်။
ထို့ကြောင့် ချင်းပြည်နယ်၊ ပလက်ဝမြို့နယ်ရှိ ပြည်သူများအနေဖြင့် စစ်ကောင်စီ၏ တရားမဝင် ရွေးကောက်ပွဲအတွက် ပြင်ဆင်ဆောင်ရွက်ရာတွင် ပူးပေါင်းပါဝင်ခြင်း၊ ရွေးကောက်ပွဲတွင်ပါဝင်ယှဉ်ပြိုင်ခြင်း၊ မဲပေးခြင်းများကို မပြုလုပ်ကြရန် တိုက်တွန်းထားသည်။
