ကရင်ပြည်နယ် ကျုံဒိုးမြို့အနီး ကျေးရွာများသို့ စစ်ကောင်စီတပ်က လက်နက်ကြီးများဖြင့် ပစ်ခတ်နေပြီး ထိတွေ့တိုက်ပွဲများလည်းဖြစ်ပွားနေကြောင်း KTL Army ဗျူဟာမှူး ဗိုလ်အယ်စေးဝါးဦးဆောင်သည့် Lion Battalion Commando – ဗျူဟာစစ်ကြောင်းကယနေ့(ဇန်နဝါရီ ၂၅ )သတင်းထုတ်ပြန်သည်။
အဆိုပါဒေသ၌ ဇန်နဝါရီ ၂၀ရက်မှစတင်ခဲ့ပြီးယမန်နေ့ (ဇန်နဝါရီ ၂၄ရက်)တွင် တိုက်ပွဲ ပိုမိုပြင်းထန်ကာ ယနေ့ မွန်းလွဲပိုင်းအထိ စစ်ရေးတင်းမာနေဆဲဟုသိရသည်။
ကရင်ပြည်နယ် ၊ ကော့ကရိတ်မြို့နယ် ၊ ကျုံဒိုးမြို့အနီးရှိကမ်းနီ ၊ မိဂလုံ ၊ ကော့ဘိန်း အစရှိသည့်ကျေးရွာများတွင်အကြမ်းဖက်စစ်ကောင်စီဘက်မှ လက်နက်ကြီးပစ်ကူများဖြင့် ပစ်ခတ်ရာ ဒေသခံပြည်သူများ၏ နေအိမ်ပေါ်များသို့ကျရောက်ပေါက်ကွဲကာ နေအိမ်များ မီးလောင်ပျက်စီးခဲ့ကြောင်း အသိပေးထားသည်။
ဗျူဟာမှူးဗိုလ်အယ်စေးဝါးဦးဆောင်သောအဖွဲ့ အပါအဝင် အခြားသော ပူးပေါင်းမဟာမိတ်တပ်ဖွဲ့များ နှင့် စစ်ကောင်စီတပ်အကြား တိုက်ပွဲပြင်းထန်နေပြီးစစ်ကောင်စီတပ်က လေကြောင်း ပစ်ကူပေးခြင်း၊ လက်နက်ကြီးပစ်ခတ်ခြင်းများပြု လုပ်နေသည်ဟုဆိုသည်။ Mi-35 ရဟတ်ယာဥ်ဖြင့် စစ်ကောင်စီတပ်က ပစ်ကူပေးခြင်းဖြစ်ကြောင်းသိရသည်။
တိုက်ပွဲအတွင်းစစ်ကောင်စီတပ်ဘက်မှကျဆုံးသူ (၄၀)ဦး နှင့် အထက်ရှိပြီး မိမိတို့ဘက်မှ ထိခိုက်ဒဏ်ရာရရှိသူအနည်းငယ်သာရှိခဲ့သည်ဟု ဗိုလ်အယ်စေးဝါးအဖွဲ့က ထုတ်ပြန်ထားသည်။စစ်ကောင်စီတပ်သေဆုံး ထိခိုက်မှုအခြေအနေကို People’s Spring က သီးခြားအတည်မပြုနိုင်သေးပေ။
ကော့ကရိတ်ဒေသခံတစ်ဦးကမူ ကျုံဒုံးဒေသ၌ စစ်ကောင်စီတပ်က လက်နက်ကြီး ရမ်းပစ်ခတ်ခြင်း၊ တော်လှန်ရေးအင်အားစုများက ဒရုန်းအသုံးပြု ပြန်လည်တိုက်ခိုက်ခြင်းများ ပြုလုပ်လျက်ရှိကြောင်း၊ ဒေသခံများ စစ်ရှောင်နေကြရကြောင်း ပြောကြားသည်။
