စစ်ကိုင်းတိုင်း၊ ဆားလင်းကြီးမြို့နယ်တွင် စစ်ကောင်စီတပ်က စစ်ကြောင်းထိုးပစ်ခတ်နေ၍ကျေးရွာ ခြောက်ရွာထက်မနည်း ထွက်ပြေးတိမ်းရှောင်နေရကြောင်း ဒေသခံများက ပြောသည်။
ယနေ့ (ဇန်နဝါရီ ၂၈ ရက်)နံနက်ပိုင်းက စစ်ကောင်စီတပ်သည် ဆားလင်းကြီးမြို့နယ်အတွင်းရှိ ကံတော ရွာ၊ ရွှေလှေရွာ၊ တုံရွာ၊ ဆည်းတည်းရွာ၊ ဇီးတောရွာနှင့် ဖောင်းကတာရွာတို့ကို ပစ်ခတ် ဝင်ရောက် စီးနင်းလျက်ရှိပြီး ဒေသခံပြည်သူများ ဘေးလွတ်ရာသို့ ထွက်ပြေးတိမ်းရှောင်နေရကြောင်း ဒေသခံများက ပြောသည်။
![ပြည်သူများထွက်ပြေးတိမ်းရှောင်နေရစဥ်၊ ဓာတ်ပုံ-ဗိုလ်ထွဋ်ခေါင်](https://i0.wp.com/www.ludunwayoo.com/wp-content/uploads/2023/01/327724769_844044566688648_3671929827057693428_n.jpg?resize=720%2C540&ssl=1)
“ချင်းတွင်းတံတားဘက်ကနေလာတာ။ လက်ရှိ ဆားလင်းကြီးနယ်ထဲ စစ်ကြောင်းနှစ်ကြောင်းထိုးနေတယ်။”ဟု ဒေသတွင်းတော်လှန်ရေးရဲဘော်တစ်ဦးက ပြောသည်။
စစ်ကောင်စီတပ်က လက်နက်ကြီးများဖြင့်လည်း ပစ်ခတ်ခဲ့ပြီး လက်တလောထိခိုက်မှုအခြေအနေမသိရသေးကြောင်း၊ ဖမ်းဆီးခံရသည့်ပြည်သူများလည်း ရှိနေကြောင်း ဒေသခံများက ပြောသည်။
![ပြည်သူများထွက်ပြေးတိမ်းရှောင်နေရစဥ်၊ ဓာတ်ပုံ-ဗိုလ်ထွဋ်ခေါင်](https://i0.wp.com/www.ludunwayoo.com/wp-content/uploads/2023/01/326940001_1359787154846798_5185880858533648131_n.jpg?resize=720%2C540&ssl=1)
ယမန်နေ့ညနေပိုင်းက ဆားလင်းကြီးမြို့ပေါ်မှထွက်လာသောစစ်ကြောင်းသည် ညောင်ပင်ကြီးရဲစခန်းတွင် ညအိပ်ခဲ့ပြီးနောက် ယနေ့နံနက်ပိုင်းတွင် စစ်ကြောင်းထိုးခဲ့ကြောင်း၊ ပြည်သူများအနေဖြင့် ဆားလင်းကြီး – ညောင်ပင်ကြီးလမ်းအားအရေးပေါ်အခြေအနေမှလွဲ၍အသုံးမပြုကြရန် ဒေသတွင်းတော်လှန်ရေးအင်အားစုများက သတိပေးထားသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)