စစ်ကိုင်းတိုင်း၊ ခင်ဦးမြို့နယ်ရှိ ရွာသစ်ကျေးရွာမီးရှို့ခံရပြီး နေအိမ်များအပြင် လယ်ယာသုံးပစစ္စည်းများနှင့် စစ်ရှောင်များအသုံးပြုနေသည့် မူးမြစ်ကူးတံတားငယ်ကိုပါ စစ်ကောင်စီတပ်က မီးရှို့ဖျက်ဆီးသွားကြောင်း ဒေသတွင်းသတင်းရင်းမြစ်များက ပြောသည်။
ယနေ့ (ဇန်နဝါရီ၂၈ရက်) နံနက်ပိုင်းက ခင်ဦးမြို့နယ် အနောက်တောင်ခြမ်း၊ ရေဦး-ညောင်ပင်သာ ကားလမ်းဘေးရှိ ရွာသစ်ကျေးရွာအား အင်းပတ်ကွေ့အထိုင်ချ တပ်စွဲထားသော စစ်ကောင်စီတပ်နှင့်ပျူ ၃၀ခန့်သည် ပစ်ခတ်ဝင်ရောက်လာပြီးနောက် နေအိမ် ခြောက်လုံးနှင့် ဈေးသည်များ၊ စစ်ရှောင်များ ကူးသန်းသွားလာနေသောမူးမြစ်ကူးတံတားငယ်အား ဒုတိယအကြိမ် အခန်း၂၀ခန့် မီးရှို့ဖျက်ဆီးသွားခဲ့ကြောင်း ခင်ဦးမြို့နယ် သတင်းမှန်ပြန်ကြားရေးအဖွဲ့က ပြောသည်။
“မူးမြစ်ကူးတံတားငယ်က ကိုယ်ထူကိုယ်ထ စစ်ရှောင်တွေ ဈေးသည်တွေ အကူးအသန်းပြုလုပ်နိုင်အောင် ကိုယ်ထူကိုယ်ထ လုပ်ထားတဲ့တံတားပါ။”ဟု ဒေသခံတစ်ဦးက ပြောသည်။
![မီးရှို့ဖျက်ဆီးခံရသော ရွာသစ်ကျေးရွာအား တွေ့ရစဥ်။ဓာတ်ပုံ- ခင်ဦးမြို့နယ်သတင်းမှန်ပြန်ကြားရေး](https://i0.wp.com/www.ludunwayoo.com/wp-content/uploads/2023/01/328045530_506516948255210_4661892351265812302_n.jpg?resize=720%2C720&ssl=1)
![မီးရှို့ဖျက်ဆီးခံရသော ရွာသစ်ကျေးရွာအား တွေ့ရစဥ်။ဓာတ်ပုံ- ခင်ဦးမြို့နယ်သတင်းမှန်ပြန်ကြားရေး](https://i0.wp.com/www.ludunwayoo.com/wp-content/uploads/2023/01/327443991_564635818909542_966152511639551860_n.jpg?resize=720%2C542&ssl=1)
![မီးရှို့ဖျက်ဆီးခံရသော ရွာသစ်ကျေးရွာအား တွေ့ရစဥ်။ဓာတ်ပုံ- ခင်ဦးမြို့နယ်သတင်းမှန်ပြန်ကြားရေး](https://i0.wp.com/www.ludunwayoo.com/wp-content/uploads/2023/01/327662904_1536541670180920_6189149786722394975_n.jpg?resize=720%2C542&ssl=1)
![မီးရှို့ဖျက်ဆီးခံရသော ရွာသစ်ကျေးရွာအား တွေ့ရစဥ်။ဓာတ်ပုံ- ခင်ဦးမြို့နယ်သတင်းမှန်ပြန်ကြားရေး](https://i0.wp.com/www.ludunwayoo.com/wp-content/uploads/2023/01/327650439_748048313354234_7930220394341312072_n.jpg?resize=720%2C720&ssl=1)
စစ်ကောင်စီတပ်၏ မီးရှို့ဖျက်ဆီးမှုကြောင့် လယ်ယာသုံး ခိုင်းနွား တစ်ကောင်သေဆုံး၍ အကောင်ရေ(၂၀)ခန့် မီးလောင်ဒဏ်ရာများရရှိခဲ့ပြီး လယ်ယာသုံး ခုတ်စက်များ၊ရေစုပ်စက်များလည်း ပျက်ဆီးဆုံးရှုံးခဲ့ကြောင်း ခင်ဦးမြို့နယ် သတင်းမှန်ပြန်ကြားရေးအဖွဲ့က ပြောသည်။
![Public Service Announcement](https://i0.wp.com/www.ludunwayoo.com/wp-content/uploads/2022/08/PSA_Inside-Story_Landmines.jpg?resize=880%2C446&ssl=1)
ထို့အပြင် ရွာသစ်ကျေးရွာအတွင်းရှိ နေအိမ်အားလုံးနီးပါး မွှေနှောက်ခံရပြီး စားစရာများ၊ကျောပိုးအိတ်များ၊ဖုန်းများအား ခိုးယူသွားခဲ့ကြောင်း၊ ရွာပြင်အထွက်၌ အမျိုးသမီး လေးဦးထံမှ ဖုန်း လေးလုံးနှင့် ငွေသားများကိုလည်း သိမ်းယူသွားကြောင်း ဒေသခံများက ပြောသည်။
ခင်ဦးမြို့နယ်တွင် စစ်ကောင်စီတပ်၏ မီးရှို့ဖျက် ဆီးမှုကြောင့် ရွာပေါင်း၆၀က နေအိမ်ပေါင်း၂,၉၀၀ကျော် ပြာကျပျက်စီးခဲ့ပြီး အိုးမဲ့အိမ်မဲ့ပြည်သူပေါင်း တစ်သောင်းခွဲခန့် ရှိနေကြောင်း ခင်ဦးမြို့နယ်သတင်းမှန်ပြန်ကြားရေးက အသိပေးထားသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)