စစ်ကိုင်းတိုင်း၊ ခင်ဦးမြို့နယ်တွင် စပါးလာသယ်သော စစ်ကောင်စီယာဥ်နှင့် ကင်းပုန်းများအား နှစ်ရက်ဆက် တိုက်ခိုက်ခဲ့ကြောင်း နရပတိဒေသခံကာကွယ်ရေးအဖွဲ့က သတင်းထုတ်ပြန်သည်။
ဇန်နဝါရီ ၁၆ ရက်က ခင်ဦးမြို့နယ်မြောက်ခြမ်းရှိ ပျူစောထီးကြီးစိုးရာ မဒေါင်းလှကျေးရွာသို့ ဇီးကုန်းမှ ကားကြီး ငါးစီးဖြင့် မူးဘောင်တစ်လျှာက် ကင်းပုန်းများချထားပြီး စပါးလာသယ်မည်ဟုသိရ၍ ကင်းပုန်းချထားသောနေရာများအား ဒရုန်းဖြင့်ကင်းထောက်ခြင်း၊ ဗုံးသီးချတိုက်ခိုက်ခြင်းများပြုလုပ်ခဲ့ကြောင်း နရပတိဒေသခံကာကွယ်ရေးအဖွဲ့က အသိပေးသည်။
နံနက် ၁၁နာရီခန့်တွင် ကား ငါးစီးဖြင့် စပါးအပြည့်တင်ဆောင်လာပြီး မဒေါင်းလှရွာမှ ပြန်ထွက်လာရာ လမ်းကြောတစ်နေရာအရောက်တွင် ကာကွယ်ရေးအဖွဲ့များနှင့် မိနစ်၃၀ကြာ နှစ်ဖက်အပြန်အလှန် ပစ်ခတ်မှုဖြစ်ပွားခဲ့ကြောင်း၊ အထိအခိုက်မသိရသေးကြောင်း နရပတိဒေသခံကာကွယ်ရေးအဖွဲ့က ဆိုသည်။
ယမန်နေ့ (ဇန်နဝါရီ ၁၇ ရက်)ကလည်း မဒေါင်းလှရွာသို့ စပါးများ ထပ်မံလာသယ်ဆောင်သော စစ်ကောင်စီ၏ ကား နှစ်စီးအား မူးဘောင်တစ် လျှောက် တွင် လုံခြုံရေးစောင့်ပေးနေသော စစ်ကောင်စီတပ်များကို ဒရုန်းဖြင့် ဗုံးသီးချတိုက်ခိုက်ခဲ့ကြောင်း နရပတိဒေသခံကာကွယ်ရေးအဖွဲ့က ထပ်မံသတင်းထုတ်ပြန်သည်။
ထိုသို့တိုက်ခိုက်နေစဥ် ဒရုန်းမှာ စစ်ကောင်စီတပ်၏ ဂျန်ပါမိ၍ အဆက်အသွယ်ပြတ်တောက်ပြီး ပျက်စီး ဆုံးရှုံးခဲ့သည်ဟု သိရသည်။
အဆိုပါ စစ်ဆင်ရေးများကို နရပတိအဖွဲ့ နှင့် Royal Tiger အဖွဲ့တို့က တိုက်ခိုက်ခဲ့ခြင်းဖြစ်သည်။ ဖြစ်စဥ်နှင့်ပတ်သက်၍ နရပတိဒေသခံကာကွယ် ရေးအဖွဲ့ထံ ဆက်သွယ်မေးမြန်းထားပြီး ပြန်လည်ဖြေကြားခြင်း မရှိသေးပေ။
ခင်ဦးနယ်တွင် ဇန်နဝါရီလလယ်ပိုင်း၌ စစ်ကောင် စီတပ်က စစ်ကြောင်းထိုးမီးရှို့ဖျက်ဆီးမှုများ ပြုလုပ်နေပြီး ပြည်သူအချို့ ဖမ်းဆီးသတ်ဖြတ်ခံထားရသည်။
