စစ်ကိုင်းတိုင်း၊ ဒီပဲယင်းမြို့နယ်အရှေ့ခြမ်းတွင် စစ်ကောင်စီတပ်က တစ်ပတ်အတွင်း ကျေးရွာဆယ်ရွာနှင့် မြို့ပေါ်ရပ်ကွက်တစ်ခုအား မီးရှို့ဖျက်ဆီးသွားကြောင်း ဒေသတွင်းသတင်းရင်းမြစ်များက ပြောသည်။
စစ်ကောင်စီတပ်သည် ဇန်နဝါရီ၂၃ ရက်ဝန်းကျင်က ရေဦးမြို့နယ်မှတဆင့် ဒီပဲယင်းမြို့နယ်အရှေ့ခြမ်းသို့ဝင်ရောက်ကာ ကျေးရွာများအား ဝင်ရောက်ဖျက်ဆီးမီးရှို့ခဲ့ခြင်းဖြစ်သည်။
“ဒီတစ်ကြိမ်စစ်ကြောင်း မီးရှို့ခံရတာ လက်တလောသိရတာ ၁၀ ရွာနဲ့ ဒီပဲယင်းမြို့ပေါ်ရပ်ကွက် တစ်ခုရှိသွားပြီ။”ဟု ဒီပဲယင်းမြို့နယ်စစ်ရှောင်ထောက်ပံ့ရေးအဖွဲ့က ပြောသည်။
စစ်ကောင်စီတပ်၏ မီးရှို့ဖျက်ဆီးမှုကြောင့် လက်ယက်ကုန်းရွာမှ နေအိမ် ၃၉ လုံး၊အုန်းတပင် မှ ၂၂၀ လုံး၊ ဒိုင်နတ်မှ ၁၂၂လုံး၊ မရကန်မှ ၇၀လုံး၊ သရက်တောမှ ၉၆ လုံး၊ မူးခတွင်းမှ ၆ လုံး၊ ယဉ်ကျေးမှ ၁၃၉ လုံး၊ မစိုးရိမ်မှ ၂လုံး နှင့်မူးရိုးကုန်းရွာမှ နေအိမ် ၁၅လုံးတို့ မီးရှို့ဖျက်ဆီးခဲ့ပြီး ညောင်လှကျေးရွာမှာ မသိရသေးကြောင်း၊ ထို့အပြင် ဒီပဲယင်းမြို့ပေါ် အနောက်ကွက်သစ်ရပ်ကွက်မှ နေအိမ် ၂၂ လုံးလည်း မီးရှို့ဖျက်ဆီးခံခဲ့ရကြောင်း ဒီပဲယင်းမြို့နယ်စစ်ရှောင်ထောက်ပံ့ရေးအဖွဲ့က ပြောသည်။
ဒီပဲယင်းမြို့နယ်တွင် ပြီးခဲ့သည့် ဒီဇင်ဘာအတွင်း မီးရှို့ဖျက်ဆီးမှုအများဆုံး ခံထားရသည်။
အာဏာသိမ်းကာလတလျှောက် နေအိမ်ပေါင်း ၄,၈၁၉ကျော်ခန့်၊ ဘုန်းကြီးကျောင်း ငါးကျောင်း၊ စျေးဆိုင်ခန်း၂၀ကျော်နှင့် ဆန်စက်များ မီးရှို့ဖျက်ဆီးခံထားရသည်။
