စစ်ကိုင်းတိုင်း၊ ကနီမြို့နယ်တွင် မိသားစုတစ်စုလိုက်ပါလာသည့် စက်လှေကို စစ်ကောင်စီတပ်က ပစ်ခတ်ခဲ့၍ အမျိုးသမီးတစ်ဦး နှလုံးရပ်သေဆုံးခဲ့ကြောင်း ဒေသတွင်းသတင်းရင်းမြစ်များက ပြောသည်။
ဇန်နဝါရီ ၃၀ရက်က မိသားစုတစ်စုသည် ယင်းမာပင်မြို့နယ်မှ ၎င်းတို့နေထိုင်ရာ ကနီမြို့နယ် ယင်းယိမ်ကျေးရွာသို့ ချင်းတွင်းမြစ်အတိုင်း စက်လှေတစ်စီးဖြင့် ဆန်တက်လာစဥ် ပစ်ခတ်ခံခဲ့ရခြင်းဖြစ်သည်။
![သေဆုံးသွားသော အမျိုးသမီးအား ကမ်းပေါ်သို့တင်ဆောင်ထားစဥ်၊ ဓာတ်ပုံ-ယင်းမာပင်မြို့နယ် သတင်းမှန်ပြန်ကြားရေး](https://i0.wp.com/www.ludunwayoo.com/wp-content/uploads/2023/01/328621113_570306161668316_5883699115343791605_n.jpg?resize=720%2C484&ssl=1)
အဆိုပါ စက်လှေသည် ကနီမြို့နယ် သပြေတောကျေးရွာအနီးသို့ ရောက်ချိန်တွင် စစ်ကောင်စီရေယာဥ်များပေါ်မှ လက်နက်ငယ်များဖြင့်ပစ်ခတ်ရာ စက်လှေပေါ်ရှိမိသားစုအနက်မှ မမာမာဝင်းဆိုသူမှာ နှလုံးဖောက်၍သေဆုံးသွားကြောင်း ယင်းမာပင်မြို့နယ် သတင်းမှန်ပြန်ကြားရေးက အသိပေးသည်။
ထို့နောက် စစ်အုပ်စုက ပစ်ခတ်ခံရသည့်မိသားစုကို ၎င်းတို့တပ်စွဲရာ သပြေတောကျေးရွာသို့ခေါ်ကာ အထက်သို့ဆန်မတက်ဘဲ အောက်သို့ပြန်စုန်ဆင်းခိုင်းခဲ့ကြောင်း ယင်းမာပင်မြို့နယ် သတင်းမှန်ပြန်ကြားရေး၏ ထုတ်ပြန်ချက်တွင် ဖော်ပြသည်။
![သေဆုံးသွားသော အမျိုးသမီးအား ကမ်းပေါ်သို့တင်ဆောင်ထားစဥ်၊ ဓာတ်ပုံ-ယင်းမာပင်မြို့နယ် သတင်းမှန်ပြန်ကြားရေး](https://i0.wp.com/www.ludunwayoo.com/wp-content/uploads/2023/01/328008739_3286515341610947_6345969534061393927_n.jpg?resize=720%2C439&ssl=1)
စစ်ကောင်စီ၏ပစ်ခတ်မှုကြောင့် သေဆုံးသွားသောအမျိုးသမီးသည် နှလုံးရောဂါရှိသူဖြစ် ကြောင်း၊သေဆုံးသူအမျိုးသမီးကို ယင်းမာပင်မြို့နယ်အတွင်းရှိ ကျေးရွာတစ်ရွာတွင် သင်္ဂြိုလ်ခဲ့ကြောင်း ယင်းမာပင်မြို့နယ်သတင်းမှန်ပြန်ကြားရေးက အသိပေးထားသည်။
ဖြစ်စဥ်နှင့်ပတ်သက်၍ ယင်းမာပင်မြို့နယ် သတင်းမှန်ပြန်ကြားရေးထံ ဆက်သွယ်မေးမြန်းထားပြီး ပြန်လည်ဖြေကြားခြင်း မရှိသေးပေ။
စစ်ကိိုင်းတိုင်းအတွင်း စစ်ကောင်စီတပ်၏ ပစ်ခတ်သတ်ဖြတ်မှုများကြောင့် ဒေသတွင်းပြည်သူများ ခရီးသွားလာရေးအခက်အခဲများ ကြုံတွေ့နေရသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)