အကြမ်းဖက်စစ်ကောင်စီတပ်က စစ်ကိုင်းတိုင်း၊ ဒီပဲယင်းမြို့နယ်မန်ကျည်းစောက်ကျေးရွာရှိအခြေခံပညာကျောင်းသူ၊ကျောင်းသား ကလေးငယ်များ၏ ကျောင်းသုံးစာအုပ်များကိုရေထဲပစ်ချဖျက်ဆီးသွားကြောင်း ဒေသခံများက ပြောသည်။
စစ်ကောင်စီတပ်သည် ပြီးခဲ့သည့် ဇန်နဝါရီ ၆ရက်က စိုင်ပြင်မှတဆင့် မန်ကျည်းစောက်ကျေးရွာကို ဒုတိယအကြိမ်မြောက်ထပ်မံဝင်ရောက်ပြီး မီးရှို့ဖျက်ဆီးခဲ့ရာ နေအိမ် ၆၉ လုံးမီးလောင်ပျက်စီးခဲ့သည်။
![(ရေထဲပစ်ချ ဖျက်ဆီးခံရသည့် မန်ကျည်းစောက်ကျေးရွာရှိ ပညာရေးကျောင်းသုံးစာအုပ်များ။ ဓာတ်ပုံ - CJ)](https://i0.wp.com/www.ludunwayoo.com/wp-content/uploads/2023/01/325154835_694643598803194_1801542549248995487_n.jpg?resize=577%2C1024&ssl=1)
![(ရေထဲပစ်ချ ဖျက်ဆီးခံရသည့် မန်ကျည်းစောက်ကျေးရွာရှိ ပညာရေးကျောင်းသုံးစာအုပ်များ။ ဓာတ်ပုံ - CJ)](https://i0.wp.com/www.ludunwayoo.com/wp-content/uploads/2023/01/325234238_874019413749418_7192840738575940943_n.jpg?resize=577%2C1024&ssl=1)
ထို့အပြင် ကျေးရွာရှိ အခြေခံပညာကျောင်းသားကျောင်းသူ ကလေးငယ်များ၏ ကျောင်းသုံး စာအုပ်များကို မူးဘောင်မှတဆင့် ရေထဲသို့ ပစ်ချသွားခြင်းဖြစ်ကြောင်း ဒီပဲယင်းမြို့နယ် ညီနောင်များအဖွဲ့က ပြောသည်။
![Public Service Announcement](https://i0.wp.com/www.ludunwayoo.com/wp-content/uploads/2022/08/PSA_Inside-Story_Landmines.jpg?resize=880%2C446&ssl=1)
စစ်ကောင်စီတပ်သည် ပြီးခဲ့သည့် ၂၀၂၂ စက်တင်ဘာ ၁၆ရက်ကလည်းလက်ယက်ကုန်းကျေးရွာရှိကျေးရွာစာသင်ကျောင်းကို လေကြောင်းကပစ်ခတ်တိုက်ခိုက်ခဲ့ရာ ကျောင်းသား၊ ကျောင်းသူများနှင့် ဒေသခံ ပြည်သူများ စုစုပေါင်း (၁၂)ဦးသေဆုံးခဲ့ပြီး ၅၀ကျော် ထိခိုက်ဒဏ်ရာရရှိခဲ့သည်။
စစ်ကောင်စီတပ်သည် ဇန်နဝါရီ ၃ ရက်မှ ၉ ရက်အထိ ဒီပဲယင်းမြို့နယ်အတွင်းရှိ ကျေးရွာ ၁၁ ရွာမှ နေအိမ်ပေါင်းရာချီ မီးရှို့ဖျက်ဆီးခဲ့သည်။
![(ရေထဲပစ်ချ ဖျက်ဆီးခံရသည့် မန်ကျည်းစောက်ကျေးရွာရှိ ပညာရေးကျောင်းသုံးစာအုပ်များ။ ဓာတ်ပုံ - CJ)](https://i0.wp.com/www.ludunwayoo.com/wp-content/uploads/2023/01/322709314_562312919244458_1180801799838814942_n.jpg?resize=720%2C405&ssl=1)
ထို့အပြင် ဆပ်ပြာကျင်းကျေးရွာနေအသက် (၈၄)နှစ်အရွယ် အဘိုးတစ်ဦး၊ အင်တိုင်းလေးကျေးရွာနေ အသက်(၈၅)နှစ်အရွယ် အဘိုးအိုတစ်ဦးတို့ မီးလောင်သေဆုံးပြီး ပျောက်ဆုံးနေသူများလည်း ရှိနေသည်။
“ဒီနေ့လည်း လက်နက်ကြီးနှစ်ချက်ရမ်းပစ်တယ်။ မဲသည်ရွာဘက်ကျတယ်ကြားတယ်။”ဟု ဒေသခံတစ်ဦးက ပြောသည်။
ဒီပဲယင်းမြို့နယ်တွင် အာဏာသိမ်းကာလတလျှောက် ဒီပဲယင်းမြို့နယ်အတွင်း နေအိမ်ပေါင်း ၄,၈၁၉ ကျော်ခန့် မီးရှို့ဖျက်ဆီးခံရပြီး မီးလောင်ဆုံးရှုံးခဲ့ရကြောင်း ဒီပဲယင်းမြို့နယ်ညီနောင်များအဖွဲ့က ပြောသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)