ချင်းပြည်နယ် ထန်တလန်မြို့ရှိ CB ဘဏ် အဆောက်အဦး၌ တပ်စွဲနေသည့် စစ်ကောင်စီတပ်ကို ယနေ့ နံနက်တွင် ဝင်ရောက်စီးနင်းခဲ့ရာ စစ်ကောင်စီတပ်မှ ဗိုလ်အပါအဝင် စစ်ကောင်စီတပ်သာ နှစ်ဦး၊ ရဲ နှစ်ဦးဖမ်းဆီးရမိခဲ့ကြောင်း ချင်းအမျိုးသားတပ်ဦး(CNF/CNA) ပြောရေးဆိုခွင့်ရှိသူ ဆလိုင်းထက်နီက အတည်ပြုသည်။
“စီးနင်းပြီးတော့မှ အဲဒီမှာ အထိအခိုက်မရှိဘဲနဲ့ သေနတ် ၈လက်ရယ် ပြီးတော့ စစ်ကောင်စီက စစ်သား နှစ်ဦးနဲ့ ရဲ လေးဦးပေါ့။စစ်သားကတော့ ဗိုလ်အဆင့်ရှိတဲ့တစ်ယောက်ပါတာပေါ့”ဟု ဆလိုင်းထက်နီက ပြောသည်။
အဆိုပါ စီးနင်းမှုကို CNFနှင့် ချင်းကာကွယ်ရေးတပ်(CDF) ပူးပေါင်းတပ်ဖွဲ့က ဆောင်ရွက်ခဲ့ခြင်းဖြစ်သည်ဟု ဆိုသည်။
စစ်ကောင်စီတပ်ကလည်း နံနက် ၁၀နာရီခန့်တွင် လေကြောင်းမှ ဗုံးကြဲတိုက်ခိုက်လာကြောင်း ဆလိုင်းထက်နီက ပြောသည်။
စစ်ကောင်စီတပ်အနေဖြင့် ၎င်းတို့ တိုက်ခိုက်ခံရပါက မြေပြင်မှမလာဘဲ လေကြောင်းကို အားကိုးပြီး တိုက်ခိုက်မှုများ လုပ်ဆောင်လေ့ရှိသည်ဟု ဆိုသည်။
“ဒီအတွက် လူထုကသော်လည်းကောင်း ကျွန်တော်တို့ ဒေသကာကွယ်ရေးတပ်ဖွဲ့တွေက သော်လည်းကောင်း အတက်နိုင်ဆုံးအတက်နိုင်ဆုံး ဝေဟင် လေကြောင်း လုံခြုံရေးကို အဓိက ပိုပြီး ကြပ်မတ် သတိထားကြဖို့ ပြောချင်တာပေါ့”ဟု ဆလိုင်းထက်နီက ပြောသည်။
