ကရင်နီ(ကယား)ပြည်နယ်၊ လွိုင်ကော်မြို့နယ်ရှိ ဇရပ်ဖြူလမ်းပိုင်းတွင် ယာဉ်တစ်စီး မိုင်းထိ၍ လေးဦးနေရာတွင်သေဆုံးပြီး နှစ်ဦးအပြင်းအထန်ဒဏ်ရာရရှိကြောင်း ရွှေလွိုင်ကော်ပရဟိတအသင်း တာဝန်ရှိသူက ပြောသည်။
ယနေ့(ဖေဖော်ဝါရီ ၆ရက်) နေ့လည် ၁ နာရီခန့်က လွိုင်ကော်မြို့မှလာသည့် အမျိုးသားခြောက်ဦးပါ အိမ်စီးကားတစ်စီးမှာ ဇရပ်ဖြူကျေးရွာအကျော်တွင် မိုင်းနင်းမိခဲ့ခြင်းဟု ဆိုသည်။
“ကားပေါ်လိုက်ပါသူ အမျိုးသားနှစ်ဦးက အပြင်းအထန်ဒဏ်ရာများနဲ့ အသက်ရှင်ကျန်နေတုန်းပဲ။ ကျန်လေးဦးက ပွဲခြင်းပြီးသေဆုံးသွားတယ်”ဟု ရွှေလွိုင်ကော် ပရဟိတအသင်းတာဝန်ရှိသူက ရှင်းပြသည်။
သေဆုံးသူများ၏ အမည်၊ လိပ်စာကို စုံစမ်းနေဆဲဖြစ်ကြောင်းလည်း ၎င်းက အသိပေးသည်။
ဇရပ်ဖြူကျေးရွာမှာ ပြီးခဲ့သည့် လပိုင်းကတည်း ကစ၍ တိုက်ပွဲအပြင်းအထန်ဖြစ်ပွားခဲ့ပြီး လက်ရှိအချိန်ထိလည်း စစ်ကောင်စီတပ်က စစ်ကြောင်းထိုးနေဆဲဖြစ်သည်။
“စစ်ရေးအခြေအနေအရကြောင့် ကားမိုင်းများ ၊နင်းမိုင်းများ ရှိနေတတ်ပါတယ်။ထိခိုက်မှုတွေဖြစ်ပွားတဲ့ ဖြစ်စဉ်တွေရှိနေပါတယ်။စကစ စစ်ကြောင်းတွေလည်း ထိုးနေတာကြောင့် အထူးသတိထားကြပါခင်ဗျာ”ဟု ကရင်နီ ပြည်သူ့ကာကွယ်ရေးတပ်ဖွဲ့ဝင်တစ်ဦးက ပြောသည်
