စစ်ကိုင်းတိုင်း၊ ရွှေဘိုမြို့နယ်၊ ကျားကျေးရွာရှိ အိမ်ခြေထောင်ချီ မီးရှို့ဖျက်ဆီးခံရပြီး အကြမ်းဖက်စစ်ကောင်စီတပ်၏ ပစ်ခတ်သံများကြောင့် သက်ကြီးရွယ်အိုသုံးဦး အမောဖောက်သေဆုံးခဲ့ကြောင်း သတင်းရရှိသည်။
ယမန်နေ့ (ဖေဖော်ဝါရီ ၁၂ ရက်)က ညောင်ပင်သာကျေးရွာ စိုက်ပျိုးရေးကျောင်းမှ စစ်ကောင်စီတပ်နှင့် ပျူစောထီးများသည် ကျားရွာသို့ ရောက်ရှိလာပြီး ကျားမြောက်ရွာ၊ ကျားအလယ်ရွာ၊ကျားတောင်ရွာနှင့် အနောက်ရွာလေးတို့ရှိ နေအိမ်များကို မီးရှို့ဖျက်ဆီးခဲ့ရာ ကျားရွာကြီးရှိ အိမ်ခြေစုစုပေါင်း၏ ငါးပုံလေးပုံခန့် မီးရှို့ဖျက်ဆီးသွားကြောင်း၊ ထို့ကြောင့် အိမ်ခြေတစ်ထောင်ခန့်မီးလောင်ဆုံးရှုံးနိုင်ကြောင်း ဒေသခံများက ပြောသည်။
ထို့အပြင် စစ်ကောင်စီတပ်၏ ပစ်ခတ်သံများကြောင့် ကျားတောင်ရွာနေ အဘိုးအိုတစ်ဦးနှင့်အဘွားအိုတစ်ဦး နှလုံးအမောဖောက် ဆုံးပါးခဲ့ပြီး ဘေးရွာရှိ အဘိုးအိုတစ်ဦးလည်း နှလုံးအမောဖောက်၍ ဆုံးပါးခဲ့ကြောင်း ဒေသခံများက ပြောသည်။
“အိမ်တွေ၊စပါးတွေ၊စပါးတိုက်တွေ၊စက်ဘီး၊ဆိုင်ကယ်၊ကား၊ ဒန်အိုးတွေ၊အိုးခွက် ၊ ပန်းကန်တွေကအစ တွေ့ကရာ မီးရှို့ဖျက်ဆီးသွားကြတယ်။သက်ကြီးဘိုးဘွားတွေလည်း ထိတ်လန့်လို့ နှလုံးအမောဖောက်ဆုံးပါးခဲ့တယ်။”ဟု ဒေသခံတစ်ဦးက ပြောသည်။
စစ်ကောင်စီတပ်သည် ကျားရွာကို ပြီးခဲ့သည့် ၂၀၂၁ ဧပြီအတွင်းက ပထမဆုံးအကြိမ် ဝင်ရောက်ဖျက်ဆီးခဲ့ပြီး ၂၀၂၂ ဧပြီတွင်လည်း ဒုတိယအကြိမ်မြောက်ဝင်ရောက်ကာ မီးရှို့ဖျက်ဆီးခဲ့ဖူးသည်။
ယနေ့ (ဖေဖော်ဝါရီ ၁၃ ရက်)တွင် အဆိုပါစစ်ကြောင်းသည် ရွှေဘိုစိုက်ပျိုးရေးကျောင်းသို့ ပြန်ဝင်သွားသည်။
ယမန်နေ့(ဖေဖော်ဝါရီ ၁၂ ရက်)နံနက်ပိုင်းက ရွှေဘိုမြို့နယ်၊ ကျောက်မြင့်ကျေးရွာအနီးတွင် သီးလုံးရွာအထိုင်ချထားသော စစ်ကောင်စီတပ်နှင့် ဒေသတွင်း PDFများ တိုက်ပွဲဖြစ်ပွားပြီး စစ်ကောင်စီတပ်က ညောင်မြင့်၊ ဒင်တဲရွာများကို မီးရှို့ဖျက်ဆီးခဲ့ကြသည်။ ယနေနံနက်ပိုင်းတွင်လည်း ငါးဆူကုန်းရွာကို ဝင်ရောက်မီးရှို့ခဲ့ကြောင်း သတင်းရရှိသည်။
