ရန်ကုန်မြို့ မင်္ဂလာတောင်ညွှန့်မြို့နယ်၌ မီးလောင်မှုဖြစ်ခဲ့ရာ မီးခိုးကြောင့် အသက်ရှုကြပ်နေသည့် လူနာသုံးဦးကို ရန်ကုန်ဆေးရုံကြီးသို့ ပို့ဆောင်ပေးခဲ့ရကြောင်း မင်္ဂလာတောင်ညွှန့်လူငယ်လူမှူကူညီရေးအသင်းက အသိပေးထားသည်။
“မီးလောင်ပြင်တွင် အသက်ရှူမွန်းကြပ် လူနာ ခြောက်ဦးခန့်ရှိပြီး သုံးဦးအား YGH.သို့ တောင်ညွန့်ကွန်ယက် ညီနောင်အသင်းများနှင့်ပူးပေါင်း၍ပို့ဆောင်ကူညီပေးခဲ့ပြီး ကျန် ၃ဦးအား မြေပြင်ကုသမှု့များပူးပေါင်း ဆောင်ရွက်ပေးခဲ့ပါသည်။” ဟု ယင်းအသင်းက ထုတ်ပြန်ထားသည်။
ဖေဖော်ဝါရီ ၁၅ ရက် နေ့လည် ၃ နာရီခန့်တွင် မင်္ဂလာတောင်ညွှန့်မြို့နယ် ၁၂၂ လမ်းရှိ တိုက်ခန်းတစ်ခုတ္ငင် မီးလောင်မှုဖြစ်ခဲ့ခြင်းဖြစ်ပြီး နာရီဝက်ကျော် မီးငြှိမ်းသတ်ခဲ့ရကြောင်း မီးသတ်တပ်ဖွဲ့က သတင်းထုတ်ပြန်ထားသည်။
“သင်္ဘောဆေးသိုလှောင်ထားတဲ့ ထပ်ခိုးကစလောင်တာတဲ့ ” ဟု ယင်းမြို့နယ်တွင် နေထိုင်သူတစ်ဦးက ပြောသည်။
မီးစတင်လောင်သည့် အခန်းတွင် မီးငြိမ်းသွားချိန်၌ မီးကူးစက်လောင်ခဲ့သည့် အခြားအခန်းတွင် မီးထပ်လောင်ခဲ့သောကြောင့် တိုက်ခန်းပေါ်တွင် နေထိုင်သူများက အရေးပေါ်ဆင်းခဲ့ရသည်ကိုလည်း တွေ့ရကြောင်း ၎င်းက ဆိုသည်။
မီးလောင်မှုအကြောင်းရင်း နှင့် ဆုံးရှုံးမှုတန်ဖိုးကို မီးသတ်တပ်ဖွဲ့ အနေဖြင့် ထုတ်ပြန်ခြင်းမရှိပေ။
