▪︎သုံးပါတ်ကျော်အတွင်းကြည့်ရှုသူတစ်သန်းကျော်လာပြီး၊ နိူင်ငံတကာက Youtuberတွေချီးကျူးနေ
အာဏာသိမ်းစစ်တပ်ရဲ့ အကြမ်းဖက်မှုတွေကိုနေ့စဥ်ရင်ဆိုင်နေရတဲ့မြန်မာနိုင်ငံရဲ့ အခြေအနေတွေကို ကမ္ဘာကသိစေဖို့ ရည်ရွယ်သီဆိုထားတဲ့ Chinlung Chauk Artist အဖွဲ့ရဲ့ We Are The World Cover Song က Youtuber တွေကြားထဲမှာ ရေပန်းစားနေပါတယ်။
ဒီသီချင်းကို ဖေဖော်ဝါရီ ၃ ရက်က လူသုံးသောင်းခွဲကျော် Subscribe လုပ်ထားတဲ့ Chin Tube You Tube Channel မှာတင်ခဲ့တာဖြစ်ပြီး သုံးပါတ်ကျော်အကြာမှာ ကြည့်ရှုသူတစ်သန်းကျော်သွားခဲ့ပြီဖြစ်ပါတယ်။
ဒီသီချင်းကို သီဆိုတဲ့ Chinland Chauk Artist အဖွဲ့မှာ အိန္ဒိယနိုင်ငံ မီဇိုရမ်ပြည်နယ်ကိုရောက်နေတဲ့ ချင်းတိုင်းရင်းသားအဆိုတော်တွေနဲ့ မီဇိုရမ်ရဲ့ နာမည်ကြီး အနုပညာရှင်တွေ စုစုပေါင်း ၂၅ ဦးကပါဝင်သီဆိုထားတာဖြစ်ပါတယ်။သီချင်းကိုCoda Band ကနေတီးခတ်ပေးထားတာဖြစ်ပါတယ်။ချင်းအဆိုတော်တွေထဲမှာ Myanmar Idol ပြိုင်ပွဲကနေနာမည်ကြီးလာတဲ့ ဘင်ဂျမင်ဆန်လည်းပါဝင်ပါတယ်။
Chinlung Chauk Artist အဖွဲ့ကပြန်ဆိုရာမှာ စစ်ကောင်စီတပ်က လေကြောင်းကနေအကြမ်းဖက်တိုက်ခိုက်နေမှုတွေ ၊ ပြည်သူတွေသတ်ဖြတ်ခံနေရတာ၊ ဖမ်းဆီးခံနေရတာ၊ထွက်ပြေးတိမ်းရှောင်နေရတာ စတဲ့စစ်တပ်ရဲ့ အကြမ်း
ဖက်မှုတွေကိုပုံဖော်သီဆိုထားကြတာဖြစ်ပါတယ်။ ဒါကြောင့် တရားမျှတမှုနဲ့ ဒီမိုကရေစီအတွက် တိုက်ပွဲဝင်နေကြတဲ့ မြန်မာပြည်သူတွေအတွက် ကမ္ဘာကြီးက ကူညီပေးကြဖို့လည်းတောင်းဆိုထားတာကိုလည်းတွေ့ရပါတယ်။ သီချင်းကို You Tube မှာ Chin tube ကနေတစ်ဆင့်အလွယ်တစ်ကူရှာနားဆင်ကြည့်ရှုလို့ရပါတယ်။
YouTubeက သီချင်းတွေကို Review လုပ်တဲ့နိုင်ငံတကာကသီချင်းဝေဖန်သူ တော်တော်များများက ဒီသီချင်း ဗီဒီယိုဖိုင်ကို Reaction Video တွေပြုလုပ်ခဲ့တာကြောင့် ပိုပြီး လူသိများလာခဲ့တာပါ။
Classy’s World Youtuber က We are The World သီချင်းကို ဂီတပုံစံအမျိုးမျိုးနဲ့ Cover သီချင်းပြုလုပ်ရာမှာ မူရင်းပုံစံကိုပြောင်းလဲတာမျိုး မတွေ့ရပေမယ့် Chinland Chauk Artist ရဲ့ တင်ဆက်မှုမှာတော့ သီချင်းပုံစံကိုပါ ပြောင်းလဲထားတာကိုတွေ့ရတယ်ဆိုပြီး သီဆိုသူတွေအားလုံးကိုလည်း ချီးကျူးထားပါတယ်။
တခြားနိုင်ငံအသီးသီက Youtuber တွေကလည်း ချီးကျူးကြပြီး ဗီဒီယိုကြည့်ရှုပြီးသူတွေကလည်း ကောင်းမွန်တဲ့ မှတ်ချက်တွေပဲပေးထားကြပါတယ်။
“We are the world reaction တွေ အကုန်ဝင်ကြည့်မိပီး ကြက်သီးတွေထ မျက်ရည်တွေ ဝဲရတယ် တကယ်ကိုကောင်းလွန်းပါတယ် ထိလည်းထိရောက်ပါတယ် သီချင်းတပုဒ်နဲ့ မီးမောင်းထိုးပြသွားတယ်” လို့ ပရိသတ်တစ်ဦး ကမှတ်ချက်ပြုထားပါတယ်။
ဒီသီချင်းမှာပါဝင်သူတွေရဲ့ အရည်အချင်းကောင်းမွန်ကြသလို Rap စာသားတွေနဲ့ သီဆိုထားတာကလည်း သီချင်းကို ပိုပြီး စိတ်ဝင်စားမှုပိုရစေတယ်လို့ ပရိသတ်တစ်ဦးကဆိုပါတယ်။
“ကိုယ့်မြန်မာပြည်မှာ ဖြစ်ပျက်နေလို့ သူတို့လေးတွေဆိုတာနားထောင်ရင်း မျက်ရည်ကျ တယ်ကွယ် ဆိုထားတဲ့ကလေးတွေ တစ်ကယ့်ကိုတော်ပါတယ် ဒီ့ထက်မက အောင်မြင်ပါစေ မြန်မာနိုင်ငံကို ကယ်တင်နိုင်ပါစေ” လို့ အခြားပရိသတ်တစ်ဦးကလည်း သူ့အမြင်ကိုပြောထားပါတယ်။
We are The World သီချင်းကို 1985 မှာ မိုက်ကယ်ဂျက်ဆင် နဲ့ လိုင်ယွန်နယ်ရစ်ချီ တို့က သီဆိုထားတာဖြစ်ပါတယ်။
အာဖရိကတိုက်ကဆင်းရဲတဲ့နိုင်ငံတွေအတွက် အလှူငွေရဖို့ ကမ္ဘာကျော်တေးသံချင်းတွေသီးဆိုရာမှာလည်း ပိုထင်ရှားနာမည်ကြီးလာတာဖြစ်ပါတယ် ။
