ပါတီရဲ့ မူဝါဒနဲ့ ရပ်တည်ချက်ကိုဆန့်ကျင်ပြီး လူထုဆန္ဒကို မလေးစားလို့ဆိုကာ ဦးဖြိုးမင်းသိန်း ၊ဒေါ်စန္ဒာမင်းအပါအဝင် ၄ ဦးကို ပါတီဝင်အဖြစ်ကနေ ထုတ်ပယ်လိုက်တယ်လို့ NLD က ဒီနေ့ညနေပိုင်းမှာ ကြေညာလိုက်ပါတယ်။
ပါတီဝင်အဖြစ်ကနေ ထုတ်ပယ်ခံရသူတွေဟာ ဗဟိုအလုပ်အမှုဆောင် ဦးဖြိုးမင်းသိန်း ၊ ဗဟိုကော်မတီဝင်တွေဖြစ်တဲ့ ဒေါ်စန္ဒာမင်း ၊ ဦးတိုးလွင်နဲ့ ဦးဝင်းမြင့်အောင်တို့ ဖြစ်တယ်လို့ NLD ရဲ့ကြေညာချက်မှာတွေ့ရပါတယ်။
![NLD ပါတီဝင်အဖြစ်ကနေ ထုတ်ပယ်ခံရတဲ့ ဦးဖြိုးမင်းသိန်းနဲ့ ဒေါ်စန္ဒာမင်း](https://i0.wp.com/www.ludunwayoo.com/wp-content/uploads/2023/03/334672337_130516826389292_6449581370068298295_n.jpg?resize=443%2C746&ssl=1)
ဒီလိုအရေးယူရတာဟာ ပါတီရဲ့အပတ်စဉ် ပုံမှန်အစည်းအဝေးတွေမှာ တက်ရောက်တဲ့ ဗဟိုကော်မတီဝင်တွေ ၊ တိုင်းနဲ့ ပြည်နယ်အလုပ်အမှုဆောင်တွေ ၊ ဗဟိုရေးရာကော်မတီဝင်တွေက ပါတီ ဥက္ကဋ္ဌ ဒေါ်အောင်ဆန်းစုကြည်အပေါ် မမှန်မကန် သက်သေထွက်ဆိုသူတွေနဲ့ ပါတီရဲ့မူဝါဒကို ဆန့်ကျင်နေသူတွေအပေါ်.အရေးယူပေးဖို့ တင်ပြလာတာကြောင့်လည်း ဖြစ်တယ်လို့ NLD ကဆိုထားပါတယ်။
ဦးဖြိုးမင်းသိန်းဟာ စစ်ကောင်စီဘက်ကနေ သက်သေထွက်ဆိုပေးသူဖြစ်ပါတယ်။
ဒေါ်စန္ဒာမင်းနဲ့ ဦးတိုးလွင်ကတော့ နေပြည်တော်အချုပ်ထောင်မှာ ဒေါ်အောင်ဆန်းစုကြည်ကို စစ်ကောင်စီ စီစဉ်ပေးမှုနဲ့ သွားတွေ့ခဲ့တယ်လို့ ပြီးခဲ့တဲ့ ဒီဇင်ဘာလဆန်းပိုင်းက သတင်းတွေကျယ်ကျယ်လောင်လောင်ထွက်ခဲ့ပါသေးတယ်။
ဒီသတင်းတွေအပေါ် ဒေါ်စန္ဒာမင်းရော ဦးတိုးလွင်ပါ ပြန်လည်ဖြေရှင်းတာမျိုးမတွေ့ရပါဘူး။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)