စစ်ကိုင်းတိုင်း ထီးချိုင့်မြို့နယ် ကျောက်မှော်ကျေးရွာကို မီးရှို့ဖျက်ဆီးခဲ့သည့် စစ်ကောင်စီတပ်က ဒေသခံလူငယ်သုံးဦးကို ရိုက်နှက်ဖမ်းဆီးခေါ်ဆောင်သွားရာ သုံးရက်မြောက်အထိ ပြန်လွတ်မလာသေးကြောင်း ဒေသခံများက ပြောသည်။
“ ရွာကို စမီးရှို့တဲ့နေ့က ပျောက်နေတာ။ ဘယ်လိုမှ စုံစမ်းလို့မရဘူး။ ဒီမနက် သတင်းရတာက စစ်ကြောင်းက ကြိုးတုပ်ရိုက်နှက်ပြီးခေါ်သွားတာ သိရတယ်။ သူတို့က အရပ်သားတွေပါ” ဟု ကျောက်မှော်ရွာဒေသခံတစ်ဦးက ပြောသည်။
ဖမ်းဆီးခံလိုက်ရသော လူငယ်သုံးဦးအတွက် ဒေသခံများက စိတ်ပူနေကြသည်။ စစ်ကောင်စီစစ်ကြောင်းက ယမန်နေ့(မတ်လ ၁၀ရက်)ညနေတွင် ကျေးရွာမှထွက်ခွာသွားပြီဖြစ်ပြီး အဆိုပါ လူငယ်သုံးဦးမှာ ပြန်လွတ်မြောက်လာခြင်း မရှိသေးပေ။
“ မိသားစုဝင်တွေ စိတ်ပူနေကြတယ်။ ဒီလူငယ်တွေက အရပ်သားစစ်စစ်ပါ။ ဘယ်လိုတွေ လုပ်ရမယ်လဲ မသိကြတော့ဘူး။ တစ်ရွာလုံးလည်း ဒုက္ခရောက်နေပြီ” ဟု ဒေသခံအမျိုးသမီးတစ်ဦးကပြောသည်။
စစ်ကောင်စီတပ်သည် ကျောက်မှော်ကျေးရွာအနောက်ပိုင်းရှိ ပြည်သူ့ကာကွယ်ရေးတပ်ဖွဲ့စခန်းကို မတ်လ ၉ရက် နံနက်အစောပိုင်းတွင် စီးနင်းတိုက်ခိုက်ပြီးနောက် နေအိမ် ၆၀၀ခန့်ရှိသော ကျောက်မှော်ရွာကို မီးရှို့ဖျက်ဆီးခဲ့သည်။
“ ရွာထဲကို ဝင်လာကတည်းက လက်နက်မျိုးစုံပစ်ဝင်လာပြီး မြင်သမျှ ပစ်တာ။ တစ်ရွာလုံးကို ရှို့တာ။ အိမ်တွေလည်း ကုန်ပြီ” ဟု ဒေသခံတစ်ဦးက ပြောသည်။
ကျောက်မှော်ရွာတွင် နေအိမ် ၄၅၀ခန့် မီးလောင်သွားပြီး တစ်ရွာလုံးသည် ထွက်ပြေးတိမ်းရှောင်နေရသည်ဟု သတင်းရရှ်ိသည်။ ထိုစစ်ကောင်စီစစ်ကြောင်းသည် ကသာနယ်ဘက်သို့ ထွက်ခွာသွားပြီဖြစ်ကြောင်းနောက်ဆုံး သတင်းရရှိသည်။
