အာဏာသိမ်းစစ်ကောင်စီက ၎င်းတို့၏ အကြမ်းဖက်မှူဖြစ်စဉ်များကို ဖုံးကွယ်နိုင်ရန် ရည်ရွယ်ကျင်းပသည်ဟုဆိုသည့် အကယ်ဒမီပေးပွဲကို ပြည်သူများအနေဖြင့် Boycott အပြင်းအထန်ပြုလုပ်ကြရန် တော်လှန်ရေးအင်အားစုများက တောင်းဆိုသည်။
“နိုင်ငံအနှံ့ စစ်ကောင်စီကြောင့် ဒုက္ခအခက်အခဲများစွာ ရင်ဆိုင်နေရတဲ့ပြည်သူတွေ ၊ စစ်ဒဏ်သင့်နေတဲ့ မိသားစုဝင်တွေအပါအဝင် တော်လှန်တိုက်ပွဲဝင်နေတဲ့ ရဲဘော်တွေကို ငဲ့ကွက်သောအားဖြင့် စစ်ကောင်စီက ပြုလုပ်မယ့် အကယ်ဒမီပေးပွဲကို ပြည်သူလူထုတစ်ရပ်လုံးအနေနဲ့ အပြင်းအထန် Boycott လုပ်ကြဖို့ တောင်းဆိုလိုက်ရပါတယ်။ ” ဟု Yangon Revolution Force -YRF က တောင်းဆိုထားသည်။
စစ်ကောင်စီက ၂၀၁၉ ၊၂၀၂၀ ၊၂၀၂၁ သုံးနှစ်စာအတွက် အကယ်ဒမီပေးပွဲကို မေလ ၆ ရက်တွင် နေပြည်တော်၌ ကျင်းပရန် စီစဉ်နေခြင်းဖြစ်ပြီး ယင်းပွဲတတ်ရောက်ရန် အနုပညာရှင်များကိုလည်း ဖိအားစီစဉ်နေခြင်းဖြစ်သည်။
ထို့ကြောင့် ပြည်သူများအနေဖြင့် စစ်ကောင်စီက ကျင်းပမည့် အကယ်ဒမီပေးပွဲကို ကြည့်ရှုခြင်း ၊ ယင်းပွဲအကြောင်းပြောဆိုခြင်း ၊မျှဝေခြင်းများ မပြုလုပ်ရန် YRF ကတောင်းဆိုသည်။
စစ်ကောင်စီထောက်ခံသည့် တယ်လီဂရန် ချန်နယ်များ၌ အကယ်ဒမီပွဲတတ်ရောက်သည့် အနုပညာရှင်များကို Social Punishment ပြုလုပ်သူများအား အရေးယူဆောင်ရွက်ရန် ဧပြီကတည်းက ဖြန့်ဝေမှုများပြုလုပ်လျက်ရှိသည်။
အနုပညာရှင်များကို အကယ်ဒမီမတတ်ရောက်ရန် ဒေသအသီးသီးမှ တော်လှန်ရေးအဖွဲ့များက သပိတ်များဖော်ဆောင်၍ တိုက်တွန်းမှုများပြုလုပ်လျက်ရှိသည်။
